कामरगावनजिक अपघात; सहाजण जखमी!

ऑटो-चारचाकी वाहनाची धडक; गंभीर जखमींना अमरावतीला हलविले.

कामरगाव (जि. वाशिम), दि. १२- येथून एक किलोमिटर अंतरावर ऑटोला चारचाकी वाहनाने मागून धडक दिली. या अपघातात ऑटोमधील सहा प्रवासी जखमी झाले. त्यापैकी तिघांना गंभीर दुखापत झाली असून त्यांना उपचारार्थ अमरावती येथे हलविण्यात आले आहे.
एम.एच.३७ जी ९६0 या क्रमांकाचा प्रवासी ऑटो खेर्डा येथून कामरगावला येत असताना कामरगावहून एक किलोमिटर अंतरावर पाठीमागून येणार्‍या मालवाहू वाहनाने ऑटोला धडक दिली. यावेळी ऑटो रस्त्याच्या कडेला उतरून पलटी झाला. त्यात वेणुबाई गहूले (रा.कामरगाव), प्रकाश खंडारे (हिंगणवाडी), शे.नौशाद सै.इस्लाम (कामरगाव) हे तिघे गंभीर जखमी झाले असून त्यांना अमरावती येथे हलविण्यात आले आहे. दादाराव सोनवाने, देवानंद चक्रे, नेहा चर्‍हाटे हे प्रवासी किरकोळ जखमी झाले आहेत. वाहनचालक डिगांबर सिताराम वानखडे (रा.टेंभी) यास पोलिसांनी अटक केली असून पुढील तपास ठाणेदार राहूल आठवले यांच्या मार्गदर्शनाखाली जमादार शंकर जाधव करीत आहेत.