केकतउमरा ग्रामपंचायतीची २७ मे ला निवडणूक!

वाशिम : राज्य निवडणूक आयोगाने जून ते सप्टेंबर २०१७ या कालावधीत मुदत संपणाऱ्या ग्रामपंचायतींचा निवडणूक कार्यक्रम जाहीर केला आहे. त्यानुसार, वाशिम तालुक्यातील केकतउमरा ग्रामपंचायतीची सार्वत्रिक निवडणूक २७ मे २०१७ रोजी होणार असल्याचे जिल्हाधिकारी कार्यालयामार्फत मंगळवारी कळविण्यात आले आहे.
५ ते १२ मे या कालावधीत सुट्टीचे दिवस वगळून सकाळी ११ ते ३ वाजेपर्यंत निवडणुकीकरिता नामनिर्देशनपत्र स्वीकारण्यात येणार आहेत. १५ मे रोजी सकाळी ११ वाजल्यापासून नामनिर्देशनपत्रांची छाननी होईल. नामनिर्देशनपत्र मागे घेण्याची अंतिम मुदत १७ मे रोजी ३ वाजेपर्यंत आहे. दुपारी ३ वाजेनंतर निवडणूक लढविण्यास इच्छुक उमेदवारांना निवडणूक चिन्हांचे वाटप व उमेदवारांची यादी प्रसिद्ध करण्यात येईल.
आवश्यकता वाटल्यास २७ मे रोजी सकाळी ७.३० ते ६.३० या कालावधीत मतदान घेण्यात येईल. त्यानंतर २९ मे २०१७ रोजी मतमोजणी होणार असल्याचे जिल्हाधिकारी कार्यालयाने प्रसिद्धीस दिलेल्या पत्रकात नमूद केले आहे.