भागवत कथा श्रवणाने काम, क्रोध, अहंकार नष्ट होतो!

वाशिम : स्थानिक ओंकारेश्वर धाममध्ये श्रीमद् भागवत कथा सप्ताहाला सोमवारी प्रारंभ झाला. या सप्ताहाच्या पहिल्याच दिवशी भाविकांचे प्रबोधन करताना आचार्य विजयप्रकाश दायमा यांनी भागवत कथा श्रवण केल्याने काम क्रोध अहंकार नष्ट होते, असे प्रतिपादन केले.

श्री चरखा परिवार व गायत्री सत्संग मंडळाच्यावतीने श्रावण मासानिमित्त दरवर्षीप्रमाणे आचार्य विजय प्रकाश दायमा यांच्या वाणीतून स्थानिक ओंकारेश्वर धाम चरखा यांच्या निवास्थानी गुरुद्वारा रोड येथे श्रीमद् भागवत कथा सप्ताहाला प्रारंभ झाला आहे. यात भाविकांचे प्रबोधन करताना आचार्य दायमा म्हणाले की, मनुष्याने आपल्या वाणीवर नियंत्रण ठेवणे जरुरी आहे. जीवनात पाणी व वाणीचा सदुपयोग करावा, असे सांगतानाच भागवत कथा श्रवण केल्याने काम क्रोध अहंकार नष्ट होत असल्याचे त्यांनी सांगितले. स्थानिक श्री ओंकारेश्वर धाम येथे आयोजित श्रीमद भागवत सप्ताहाचे मुख्य यजमान ज्योती चरखा, पप्पूभाऊ चरखा असून त्यांनी सर्वप्रथम आचार्य दायमा यांचे पूजन केले. यावेळी पुढे दायमा म्हणाले की, आज ठिकठिकाणी भागवत सप्ताह आयोजित केल्या जात आहे. मात्र मनुष्याला मानसिक शांती मिळत नाही. याचे कारण मनुष्य हा भागवत कथा ऐकतो मात्र त्याचे चिंतन मनन अनुसरण करत नाही. आईवडिलांची सेवा केल्याने ईश्वराची प्राप्ती होते. मनुष्य प्राप्तीसाठी संयम, सदाचार, सेवा व स्नेह हे चार गुण अंगी आवश्यक असल्याचेही ते म्हणाले.

------

दरदिवशी १२ ते ५ दरम्यान कथा वाचन

श्रीमत भागवत कथा दररोज दुपारी बारा ते पाच वाजताच्या दरम्यान होत आहे. शासकीय नियमाचे पालन करीत भागवत कथा यू ट्यूब व फेसबुकवर लाईव्ह दाखविण्यात येत आहे. भाविक भक्तांनी कोरोना नियमाचे पालन करून कथा श्रवण करण्याचे आवाहन चरखा परिवार व आनंद दायमा, सत्यनारायण अग्रवाल, कचरूलाल भांगडिया, नीलेश सोमानी आदींनी केले आहे.