राज्याबराेबरच वाशिम जिल्ह्यातही महाविकास आघाडी साथ-साथ

नंदकिशोर नारे

वाशिम : राज्यात महाआघाडीचे सरकार असून शिवसेना, काँग्रेस आणि राष्ट्रवादी असे तीन पक्ष एकत्र आहेत. जिल्ह्यातही महाविकास आघाडी साथ साथ दिसत असून, जिल्हा परिषदेसह, तीन पंचायत समित्यांमध्ये आघाडी एकत्र नांदत आहेत.

जिल्ह्यातील तीन पंचायत समित्यांमध्ये मात्र आघाडीला यश न मिळाल्याने इतरांची सत्ता आहे. वाशिम नगरपालिकेचे नगराध्यक्ष जनतेतून निवडून आल्याने शिवसेनेचे आहेत. परंतु काँग्रेस, राष्ट्रवादी काँग्रेसच्या सदस्यांची संख्या बाेटावर माेजण्याइतपत असल्याने येथे आघाडीची सत्ता म्हणता येणार नाही, असे असले तरी जिल्ह्यात शिवसेना, काॅंग्रेस व राष्ट्रवादी काॅंग्रेस साेबत दिसून येतात.

----------

पंचायत समिती

जिल्ह्यातील ६ पंचायत समित्यांपैकी वाशिम, कारंजा, मंगरुळपीर या तीन ठिकाणी महाविकास आघाडी असून, रिसाेडात अनंतराव, मालेगावात अनंतराव, रा. काॅ. तर मानाेऱ्यात भाजप.

जिल्हा परिषद

जिल्हा परिषदेत महाविकास आघाडीची सत्ता आहे. रा. काॅं. १२, काॅंग्रेस ९, तर शिवसेनेचे ६ सदस्य आहेत, तर भाजप ६, वंचित ८, अनंतराव देशमुख ७, अपक्ष ४ सदस्य आहेत.

नगर पालिका

नगरपालिकेत शिवसेनेचे नगराध्यक्ष असून, भाजपचे सर्वाधिक नगरसेवक निवडून आले आहेत. काॅंग्रेस व राष्ट्रवादी काॅंग्रेसचे नगरसेवक नगरपालिकेत कमी आहेत.

---------

तीन पक्ष, तीन विचार

जिल्हा परिषद पाेटनिवडणूक कार्यक्रम जाहीर झाल्यानंतर महाविकास आघाडीतील तीनही पक्षांनी निवडणूक लढविण्याची तयारी दर्शविली हाेती. तिघेही एकत्र निवडणूक लढण्यासाठी पक्ष नेत्यांच्या निर्णयावर अवलंबून दिसून येत हाेते.

जिल्हा परिषद पाेटनिवडणुकीत महाविकास आघाडीने एकत्र लढावे, यावर काेणताही निर्णय न झाल्याने शिवसेना, काॅंग्रेस व राष्ट्रवादी काॅंग्रेसच्या उमेदवारांनी स्वतंत्र उमेदवारीसाठी तयारी केली हाेती.

जिल्हा परिषद पाेटनिवडणुकीत महाविकास आघाडीतील तीनही पक्षातील नेत्यांचे मनाेमिलन न झाल्याने एकमेकाविरूध्द निवडणूक रिंगणात उतरले हाेते. ऐनवेळी निवडणूक रद्द झाल्याने मात्र सर्वांच्या मनसुब्यावर पाणी फेरले गेले.

------

पक्षांचे जिल्हाप्रमुख म्हणतात...

राज्यात महाविकास आघाडीची सत्ता आहे. त्याचप्रमाणे जिल्ह्यातही आम्ही महाविकास आघाडीतील पक्षासाेबत राहताे.

- सुरेश मापारी,

शिवसेना, जिल्हाध्यक्ष

-------

पक्षश्रेष्ठी यांच्याकडून येत असलेल्या सर्व नियमांचे पालन करून महाविकास आघाडी नियमांचे पालन जिल्ह्यात सुरू आहे. आघाडी व्यवस्थित आहे.

- ॲड. दिलीपराव सरनाईक,

काॅंग्रेस जिल्हाध्यक्ष

--------

राज्याप्रमाणे जिल्ह्यात महाविकास आघाडीत असलेले सर्व पक्षातील नेते, पदाधिकारी, कार्यकर्ते सर्व साेबत राहून कार्य करीत आहेत.

- चंद्रकांत ठाकरे,

राष्ट्रवादी काॅंग्रेस, जिल्हाध्यक्ष