मास्क न वापरणाऱ्या नागरिकांवर पालिकेचा वाॅच

रिसाेड : शहरात दिवसागणिक वाढत चाललेल्या कोरोना रुग्णांच्या पृष्ठभूमीवर मुख्याधिकारी गणेश पांडे यांनी तीन स्वतंत्र पथके तयार केली आहेत. एका पथकामध्ये आठ कर्मचारी असे एकूण २४ कर्मचारी तीन पथकांमध्ये सहभागी करण्यात आले असून याकामात स्वतः जातीने मुख्याधिकारी गणेश पांडे लक्ष देत आहे.

जिल्हाधिकारी यांच्या सूचनेनुसार हे पथक तयार करण्यात आले आहे. पथकातील कर्मचारी सकाळपासून संध्याकाळपर्यंत शहरातील संपूर्ण भाग पिंजून काढत आहे. यामध्ये विनामास्क दिसणाऱ्या नागरिकांना, व्यापारी प्रतिष्ठानांवरील व्यावसायिक, कामगार यांना मास्क वापरण्याविषयी सूचना करीत असून मास्क न वापरणाऱ्यांवर दंडात्मक कारवाई करीत आहे. तसेच शहरातील मंगल कार्यालय, सार्वजनिक ठिकाणी शासनाने आखून दिलेल्या कोरोनासंदर्भातील नियमांचे पालन होते की नाही, याकडे कटाक्षाने लक्ष देत आहेत. या कामात पथकासोबत मुख्याधिकारी गणेश पांडे स्वतः जातीने लक्ष देऊन नागरिकांना मास्क तसेच सोशल डिस्टन्स ठेवण्यासंदर्भात सूचना करीत आहेत. गत दोनदोन दिवसांत रिसोड शहरातील वाढती कोरोना रुग्णांची संख्या हा चिंतेचा विषय बनला आहे. पालिका प्रशासन कोरोना रुग्णांच्या संपर्कात आलेल्या नागरिकांचा शोध घेऊन चाचणी करण्यास सांगत आहे. यामध्ये सौम्य लक्षणे आढळणाऱ्या कोरोनाबाधितांना गृहविलगीकरणात राहण्यास सांगत आहे. तिन्ही पथकांत नेमून दिलेल्या सर्व कर्मचाऱ्यांना पालिका प्रशासनाने दिलेल्या निर्देशानुसार शहरातील सर्व मंगल कार्यालये व इतर सार्वजनिक कार्यक्रमांमध्ये पन्नासपेक्षा अधिक नागरिक आढळल्यास त्यांच्यावर दंडात्मक कारवाई सुरू केली आहे. तसेच या कामात जे पालिका कर्मचारी कुचराई करतील, त्यांच्यावरसुद्धा कारवाई करण्याचा इशारा मुख्याधिकारी पांडे यांनी दिला आहे.