काँग्रेसचा विचारच देशाला वाचवू शकतो : नाना पटोले

अध्यक्षस्थानी प्रदेशाध्यक्ष नाना पटोले होते, तर प्रमुख पाहुणे म्हणून माजी प्रदेशाध्यक्ष माणिकराव ठाकरे, आ. वजाहत मिर्झा, आ. कुणाल पाटील, माजी आ. नातिकोद्दीन खतीब, निरीक्षक अतुल लोंडे, जिल्हा निरीक्षक प्रकाश साबळे, जिल्हाध्यक्ष एड. दिलीप सरनाईक, मो. युसूफ पुंजानी, जिल्हा प्रवक्ता दिलीप भोजराज आदींची उपस्थिती होती. नाना पटोले म्हणाले की, कोरोना महासंक्रमणात काँग्रेस कार्यकर्त्यांनी रस्त्यावर उतरून केलेल्या कामाची शाबासकी देण्यासाठी तसेच कोरोनाच्या तिसऱ्या लाटेत करावयाच्या उपाययोजनांचा आढावा घेऊन शासनाच्या माध्यमातून प्रश्‍न सोडविण्यासाठी आपण दौरा करीत असल्याचे त्यांनी सांगितले. केंद्र सरकार सत्तेत आल्यापासून धान्याची भीक देत आहे. द्यायचेच असेल तर पैसे द्यावे. आम्ही काँग्रेस सत्तेचा दूरपर्यंत विचार करीत नाही. नुकतेच काँग्रेसच्यावतीने राज्यात पेट्रोल, डिझेल दरवाढीच्याविरोधात आंदोलन केले. केंद्र सरकार पेट्रोलच्या मूळ किमतीवर १८ रुपये प्रती लिटर रस्ते विकासाचा कर घेते. पेट्रोल १०० रुपयांच्या वर गेले असून, डिझेलही लवकरच शतक गाठणार असल्याचे त्यांनी सांगितले. वाजपेयी सरकार ते डॉ. मनमोहनसिंग सरकारपर्यंत १ रुपया रस्ते विकासाचा कर घेतला जात होता. त्यावेळी १९ हजार कोटी रुपये केंद्राच्या तिजोरीत जमा होत होते, असे त्यांनी सांगितले. मोदी सरकारने खासगीकरण करण्याचा सपाटा लावला. शासकीय कंत्राटदारांकडून इस्टिमेट केले जात आहे. रस्त्यांमध्ये भ्रष्टाचार होत असल्याचा आरोपही पटोले यांनी केला. ओबीसींचे नुकसान भाजपने केल्याने त्यांना ओबीसींच्या आरक्षणासाठी मोर्चे काढण्याचा काहीही अधिकार नसल्याचेही पटोले म्हणाले. मेळाव्याच्या यशस्वीतेसाठी तालुकाध्यक्ष रमेश लांडकर, शहराध्यक्ष हमीद शेख यांनी पुढाकार घेतला. संचालन शमीम फरहत यांनी, तर आभार अ‍ॅड. फिरोज शेकूवाले यांनी मानले.