पीकविमा काढण्याकडे शेतकरी वर्गाने फिरवली पाठ

मेडशी : गेल्या खरीप हंगामात पिकांचे संरक्षण करण्यासाठी तालुक्यातील ७ हजारपेक्षा शेतकऱ्यांनी पीकविमा उतरविला होता. यातील काही मोजक्याच शेतकऱ्यांना पंतप्रधान पीकविमा योजनेची मदत मिळाली, तर उर्वरित शेतकऱ्यांना अपात्र ठरविण्यात आले. यामुळे यावर्षी अनेक शेतकऱ्यांनी विमा उतरवण्याकडे पाठ फिरविल्याचे दिसून येत आहे.

तालुक्यात गेल्यावर्षीच्या खरीप हंगामात शेतकऱ्यांना अनेक अडचणींचा सामना करावा लागला. गेल्या खरीप हंगामात परतीच्या अतिवृष्टी आणि ओल्या दुष्काळामुळे पिकांना फटका बसला. सोयाबीन, कापूस या प्रमुख पिकांचे अतोनात नुकसान झाले. तूर शेतकऱ्यांच्या घरात येईल अशी अपेक्षा असताना पुन्हा पावसाने शेतकऱ्यांच्या तोंडचा घास हिरावला. त्यामुळे पंतप्रधान पीकविमा योजनेचे कवच असल्याने शेतकऱ्यांना विमा मिळण्याची अपेक्षा होती. त्यातून काही प्रमाणात का होईना, यावर्षीच्या हंगामासाठी शेतकऱ्यांना थोडा आधार मिळाला असता, मात्र या ठिकाणीही शेतकऱ्यांची निराशा झाली. शेतकऱ्यांना पीकविम्याचा लाभ मिळावा याकरिता राजकीय पक्षांनी आंदोलनेही केली. मात्र, शेतकऱ्यांच्या तोंडाला विमा कंपन्यांनी पाने पुसण्याचे काम केले. विमा कंपन्यांनी ऐनवेळी शेतकरी वर्गाला काही अटी व नियम लावत वगळले व स्वतः चा कोटींचा लाभ करून घेतला. त्यामुळे यंदा शेतकरी वर्गाने पीकविमा उतरवण्याकडे पाठ फिरवली आहे.

...............

मानाेरा येथेही शेतकऱ्यांची पाठ

मानोरा : गेल्यावर्षी झालेल्या अवकाळी पावसामुळे सोयाबीन पिकाचे नुकसान झाले होते. त्याची कास्तकारांना नुकसानभरपाई मिळाली नाही. तसेच शेतकऱ्यांना कोणताही लाभ देण्यात आला नााही. त्यामुळे यावर्षी अनेक कास्तकार पीकविम्यापासुन दूर आहेत. गेल्यावर्षी कास्तकारांनी कोटी रुपयांचा पीकविमा भरला, मात्र त्यांना पीकविमा देण्यात आला नाही. नुकसान होऊनही पदरात काहीच पडले नसल्यामुळे यावर्षी पीक विमा भरण्यात कास्तकारांनी नाराजी व्यक्त केली आहे.