पूर्वसूचना न देता तोडला जातोय कृषीपंपाचा वीजपुरवठा

विधानसभेत २ मार्च रोजी झालेल्या चर्चेदरम्यान महावितरणच्या थकबाकीदार ग्राहकांचा विद्युत पुरवठा तोडण्यास उपमुख्यमंत्री अजित पवार यांनी स्थगिती दिली होती; मात्र नऊच दिवसांनंतर १० मार्च रोजी अधिवेशनाच्या समारोपीय सत्रात ऊर्जामंत्री नितीन राऊत यांनी स्थगिती उठवून विद्युत देयक वसुलीचे फर्मान सोडले. यासंबंधीचे आदेश जिल्हास्तरावर धडकले असून, वाशिम मंडळाकडून थकबाकीदार ग्राहकांचा विद्युत पुरवठा खंडित करण्याची कारवाई जोरात सुरू झाली आहे.

जिल्ह्यातील वाशिम तालुक्यात १२ हजार १५६, रिसोड तालुक्यातील ११ हजार ५८६, मंगरूळपीर ९ हजार २०६, कारंजा ११ हजार ३७२, मानोरा ७ हजार ३१८ आणि मालेगाव तालुक्यात १० हजार ५८, अशा एकूण ६१ हजार ६९६ कृषिपंपधारक ग्राहकांना ६ हजार ८६१ कृषिपंप रोहित्रांच्या माध्यमातून वीजपुरवठा करण्यात येतो. त्यापैकी ११ मार्चअखेर थकबाकीदार असलेल्या १० हजार ४६२ कृषिपंपधारक ग्राहकांचा वीजपुरवठा महावितरणकडून कापण्यात आला. त्यापैकी ६० ग्राहकांनी चार लाख रुपये रकमेचा भरणा केला असून, उर्वरित ग्राहकांचा विद्युत पुरवठा ठप्प झाला आहे. दरम्यान, काही ठिकाणी महावितरणच्या पथकाने कुठलीही पूर्वसूचना न देता कारवाई केल्याचा आरोप शेतकऱ्यांमधून होत असून, आंदोलनात्मक पवित्रा घेण्याच्या तयारीप्रत शेतकरी पोहोचले आहेत.

..................

बॉक्स :

११ मार्चअखेर तोडलेला वीज पुरवठा (तालुकानिहाय)

वाशिम - ४१६

रिसोड - १२४२

मंगरूळपीर - ३६५

कारंजा - ९६७

मानोरा - १६३९

मालेगाव - ५८३३

...............................

कोट :

उपमुख्यमंत्री अजित पवार यांनी २ मार्च रोजी विद्युत पुरवठा तोडण्यास स्थगिती दिली आणि काहीच दिवसांत ऊर्जामंत्र्यांनी स्थगिती उठवून शेतकऱ्यांचा वीज पुरवठा खंडित करण्याची कार्यवाही हाती घेतली. कोरोनाच्या संकटामुळे आधीच जेरीस आलेल्या शेतकऱ्यांसमोर यामुळे मोठा प्रश्न उभा राहिला आहे. कारवाई न थांबविल्यास आंदोलन उभारण्यात येईल.

- राजू वानखेडे

संस्थापक, शेतकरी संघर्ष संघटना, वाशिम

...........

कोट :

महावितरणकडून अचानक सुरू झालेला विद्युतपुरवठा खंडित करण्याच्या कारवाईने शेतकरी धास्तावले आहेत. भाजीपाला व फळपिकांचे यामुळे अतोनात नुकसान होणार आहे. धडक कारवाई करण्यापेक्षा काही दिवसांची मुदत देऊन तथा पूर्वसूचना देऊनच कारवाई सुरू व्हायला हवी होती. याप्रकरणी आंदोलनाची दिशा निश्चित केली जाईल.

- विष्णुपंत भुतेकर

संस्थापक, भूमिपुत्र शेतकरी संघटना, वाशिम