रमाबाई आंबेडकर कॉलनी विविध समस्यांच्या विळख्यात

येथील गट सर्व्हे क्र. १३५ मध्ये अतिक्रमण जागेवर गेल्या १५ ते १६ वर्षांपासून ३५ घरांची वस्ती आहे. यात जवळपास ६० ते ७० रहिवासी राहत आहेत. परंतु, गेल्या अनेक वर्षांपासून येथील रहिवाशांनी या अतिक्रमण जागेवर लेआउट पाडून त्या जागा आमच्या नावे करण्यात याव्यात, येण्या-जाण्यासाठी रस्त्याची व्यवस्था करण्यात यावी, अशी मागणी केली आहे. परंतु, अद्यापपर्यंत त्यांना कुठलाही प्रतिसाद शासनाकडून मिळाला नसल्यामुळे येथील नागरिक त्रस्त झाले आहेत. याबाबत ग्रामपंचायत प्रशासन, तहसीलदार धीरज मांजरे यांना निवेदन दिले आहे.

याठिकाणी पिण्याच्या पाण्याची व्यवस्था नसल्यामुळे नागरिकांना एक किमी अंतरावरून पिण्यासाठी पाणी आणावे लागते. त्यामुळे येथे हातपंपाची व्यवस्था करावी, अशी मागणी येथील रहिवाशांकडून केली जात आहे. ही वस्ती गावाबाहेर असून, या वस्तीच्या आजूबाजूने मोठ्या प्रमाणात झाडेझुडपी वाढली आहे. त्यामुळे विंचू, साप, गोम यांची भीती येथे राहणाऱ्या नागरिकांना वाटत आहे. याविषयी अनेकदा ग्रामपंचायत धनज बु येथील सरपंच, तहसीलदार कारंजा, उपविभागीय अधिकारी कारंजा, गटविकास अधिकारी कारंजा, पंचायत समिती सभापती कारंजा, जिल्हाधिकारी कार्यालय वाशिम तसेच आमदार पाटणी यांना निवेदन दिले आहे. याकडे संबंधितांनी त्वरित लक्ष देऊन आम्हाला न्याय द्यावा, अशी माणगी येथील रहिवासी करत आहेत.

....................

आम्हा अतिक्रमणधारकांना ही जागा नावावर करून द्यावी तसेच येथे रस्ता, पिण्याच्या पाण्याची सोय, रस्त्यावर लाइट या आमच्या समस्या असून, त्या पूर्ण करण्यात याव्यात, अशी मागणी अनेकदा शासनाकडे करूनसुद्धा आम्हाला अद्यापपर्यंत कुठलाही न्याय मिळालेला नाही.

- विशाल अघमे,

रहिवासी दलितवस्ती रमाबाई आंबेडकर कॉलनी, धनज बु.

-------------

गेल्या अनेक वर्षांपासून आम्ही अनेक समस्यांनी त्रस्त झालो असून, शासनाकडे आमच्या या समस्यांविषयी कित्येकदा माहिती देऊनसुद्धा आम्हाला न्याय मिळाला नाही.

- विपुल घणघावकार

राहिवासी, दलितवस्ती रमाबाई आंबेडकर कॉलनी, धनज बु.