‘स्मार्ट कॉटन’ प्रकल्पांतर्गत कारंजातील नऊ गावांची निवड

सभेच्या अध्यक्षस्थानी सरपंच वर्षा अंबाळकर होत्या. उपप्रकल्पात निवड करण्यात आलेल्या संबंधित नऊ गावांमध्ये ‘एक गाव, एक वाण’ या संकल्पनेवर भर देत कापूस उत्पादन केले जाणार असल्याची माहिती तालुका कृषी अधिकारी संतोष वाळके यांनी यावेळी दिली. कापूस मूल्य साखळी अधिक कार्यक्षम, सर्वसमावेशक व स्पर्धाक्षम करण्यासाठी प्रकल्प राबविला जात असल्याचे मंडळ कृषी अधिकारी संतोष चौधरी यांनी सांगितले.

कारंजा तालुक्यातील वाई, वढवी, पोहा, जानोरी, पानगव्हाण, गायवळ, सोहळ, भडशिवनी, महागाव या नऊ गावांमध्ये कापसाच्या उत्पादनासाठी महाकॉट, तिरुमला जिनिंगची मदत घेतली जात आहे. ‘एक गाव, एक वाण’ ही संकल्पना अमलात आणण्यासाठी प्रशिक्षण दिले जात असून, त्यासाठी पीक प्रात्यक्षिके, शेतीशाळा यासह अन्य उपक्रम राबविण्यात येणार आहेत. बियाणांच्या निवडीपासून पिकाची मशागत, किडींचे नियंत्रण, कापसाची वेचणी यासह अन्य महत्त्वाच्या बाबींवर शेतकऱ्यांना कृषी विद्यापीठाचे शास्त्रज्ञ, कृषी विभागाचे अधिकारी, कृषी पर्यवेक्षक, कृषी सहायक मार्गदर्शन करीत आहेत. सदर कार्यशाळेस सरपंच अंबाळकर, उपसरपंच रवींद्र लाहे, प्रगतिशील शेतकरी रूपेश लाहे, विष्णू लाहे व गावातील कापूस उत्पादक शेतकरी उपस्थित होते.

रुई आधारित बाजारव्यवस्थेत शेतकऱ्यांचा सहभाग वाढवून उत्पादित कापसाला योग्य मोबदला मिळवून देणे व कापसाचा स्मार्ट कॉटन ब्रँड विकसित करणे हा या प्रकल्पाचा मुख्य उद्देश असल्याचे तालुका कृषी अधिकारी संतोष वाळके यांनी यावेळी सांगितले.