एस.टी.ची मालवाहू ट्रकला धडक; सहा प्रवासी जखमी!

कारंजा लाड, दि. २८ -  राज्य परिवहन महामंडळाच्या एस.टी. बसने मालवाहू ट्रकला जबर धडक दिली. या अपघातात बसमधील सहा प्रवासी जखमी झाले. ही घटना शनिवार, २८ जानेवारी रोजी कारंजा तालुक्यातील वालई फाट्यानजिक सकाळी १० वाजताच्या सुमारास घडली.

बुलडाणा आगाराची एम एच ४०-५८६ क्रमांकाची बस शनिवारी यवतमाळ येथून दारव्हा, कारंजा, अकोलामार्गे बुलडाणाकडे जात होती. सकाळी १० वाजताच्या सुमारास कारंजा तालुक्यातील वालई फाट्यानजीक या बसने मालवाहू ट्रकला मागून धडक दिली. या अपघातात बसमधील मोहळ येथील वच्छलाबाई महादेव कदोळे (वय ६० वर्षे), रूपाली रमेश गडुळे (वय १५ वर्षे), वढवी येथील गुलाब अवताळे (वय ६२ वर्षे) यांच्यासह कारंजा येथील किशोर यंदे, नंदा यंदे व शशी यंदे हे सहा प्रवासी जखमी झाले.

घटनेची माहिती मिळताच मनसे व समृध्दीच्या रूग्णवाहिकांनी जखमी प्रवाशांना कारंजा ग्रामीण रूग्णालयात उपचारासासाठी आणले. त्यातील तीन प्रवाशांना पुढील उपचारासाठी अकोला येथे हलविण्यात आले. याप्रकरणी ट्रकचालक मो. इरफान लाल मोहम्मद यांनी दिलेल्या फिर्यादीवरून कारंजा शहर पोलिसांनी एसटी बसचालकाविरूद्ध भादंवि २७९, ३३६, ४२७ नुसार गुन्हा दाखल केला आहे. घटनेचा पुढील तपास पोलीस उपनिरीक्षक योगेश रंदे करित आहेत.