Crime News: अश्लिल फोटो व्हायरल करण्याची धमकी; 22 वर्षीय युवतीची आत्महत्या

मयत मुलीच्या आईची तक्रार; आरोपीवर गुन्हा दाखल

वाशिम (सुनील काकडे) : २२ वर्षीय मुलीशी अश्लिल कृत्य करून ते फोटो व्हायरल करण्याची धमकी आरोपीने दिली. त्याची धास्ती घेऊनच आपल्या मुलीने १९ ऑगस्ट रोजी आत्महत्या केली. मयत मुलीच्या आईने पोलिसांत दाखल केलेल्या अशा आशयाच्या फिर्यादीवरून आरोपी रोशन राठोड (सावरगांव कान्होबा, ता. मंगरूळपीर) याच्यावर गुन्हा दाखल केला. आरोपीस अटक करून गजाआड करण्यात आले आहे.

प्राप्त माहितीनुसार, आरोपी रोशन राठोड याने मुलीशी संबंध ठेऊन भेटायला ये, असे म्हणत सार्वजनिक ठिकाणी तिचा विनयभंग केला. इतक्यावरच तो थांबला नाही तर त्याने मुलीला जबरदस्तीने मोटारसायकलवर बसवून तिच्याशी अश्लिल कृत्य केले. त्याचे काढलेले फोटो व्हायरल करण्याची धमकी दिली. राठोडच्या त्रासाला कंटाळूनच मुलीने आत्महत्या केली, अशी तक्रारी तिच्या आईने मंगरूळपीर पोलिसांत दाखल केली. पोलिसांनी राठोडला अटक करून त्याच्यावर भादंविचे कलम ३७६, ३०६, ३५४, ३६६, ३२३, ५०६ व अनुसूचित जाती-जमाती अत्याचार प्रतिबंधक कायद्यातील तरतूदीनुसार गुन्हा दाखल केला. पुढील तपास मंगरूळपीर पोलीस करत आहे.