व्यापाऱ्यांनी फिरविली टरबूज खरेदीकडे पाठ!

धनज बु. : कोरोनामुळे यंदाही शेतकरी अडचणीत असून, कडक निर्बंध लागू असल्याने बाजारपेठ बंद आहे. परिणामी, टरबूज खरेदी करण्याकडे व्यापाऱ्यांनी पाठ फिरविल्याने याचा फटका धनज बु. परिसरातील शेतकऱ्यांना बसत आहे.

उन्हाळ्यात थंड व शरीरास पोषक असणार फळ म्हणून टरबुजाची ओळख आहे. धनज ब. परिसरात शेतकऱ्यांकडून या पिकाचे मोठ्या प्रमाणात उत्पादन घेतले जाते. सुरुवातीला या वर्षी टरबुजाला चांगला भाव मिळाला. जिल्ह्यातील टरबुजाला कोलकाता, दिल्ली बाजरापेठेत मागणी वाढल्याने बारा रुपये प्रतिकिलो एवढा उचांकी दर मिळाला, परंतु १५ एप्रिलनंतर लागू करण्यात आलेल्या कडक निर्बंधांमुळे टरबुजाचे दर बारा रुपये प्रतिकिलोवरून चार रुपये प्रतिकिलो एवढी घसरले. त्यामुळे मोठ्या आशेने टरबूज पीक घेणाऱ्या शेतकऱ्यांची निराशा होऊन आर्थिक नुकसान होत आहे. सद्या बाजारपेठा बंद असल्याने व्यापाऱ्यांनीही शेतकऱ्यांच्या मालाकडे पाठ फिरवली आहे. त्यामुळे पुन्हा एकदा शेतकरी आर्थिक संकटात सापडला आहे.

00

कोट

दोन एकर शेतामध्ये टरबूज पिकाची लागवड केली आहे. सुरुवातीला टरबूज पिकाला चांगले भाव होते, परंतु कडक निर्बंधामुळे दरात मोठ्या प्रमाणात घसरण झाल्याने टरबूज पिकाला लावलेला खर्चही निघणे कठीण आहे.

- बाळू हेरोडे, शेतकरी