१०८ रुग्णवाहिकेसाठी वेटिंग; दररोज १०० वर कॉल्स !

वाशिम : जिल्ह्यात कोरोना विषाणू संसर्गाचा प्रादुर्भाव वाढत असून, कोरोना चाचणी अहवाल पॉझिटिव्ह आल्यानंतर रुग्णाला घर ते कोविड केअर सेंटरपर्यंत घेऊन जाण्यासाठी १०८ रुग्णवाहिकेचा मोठा आधार आहे; परंतु रुग्णसंख्या वाढत असल्याने दररोज १०० वर कॉल्स येत असून, रुग्णवाहिकेसाठीही वेटिंगवर राहण्याची वेळ आली आहे.

जिल्ह्यात जिल्हा सामान्य रुग्णालय, ग्रामीण रुग्णालय याशिवाय प्राथमिक आरोग्य केंद्र स्तरावर रुग्णवाहिकेची मोफत सुविधा उपलब्ध आहे. फेब्रुवारी महिन्यापासून कोरोनाबाधितांची संख्या झपाट्याने वाढत आहे. त्यामुळे रुग्णवाहिकेच्या फेऱ्याही प्रचंड प्रमाणात वाढल्या आहेत. जानेवारी महिन्यापर्यंत ११ पैकी तीन रुग्णवाहिकेतून कोरोनाचे रुग्ण नेले जात होते; परंतु मार्च महिन्यापासून रुग्णसंख्या झपाट्याने वाढल्याने आता सर्वच रुग्णवाहिकेतून कोरोनाचे रुग्ण नेण्यात येत आहेत. कोरोना चाचणी अहवाल पॉझिटिव्ह आल्यानंतर १०८ रुग्णवाहिकेला कॉल केला की, उपलब्धतेनुसार रुग्णवाहिका दारापर्यंत येते. रुग्णसंख्या वाढत असल्याने दैनंदिन १०० च्या पेक्षा अधिक कॉल येत आहेत. त्यामुळे अनेकांना वेटिंगवर राहण्याची वेळ आली आहे. ग्रामीण भागातून जिल्हास्तरावर येण्यासाठी किमान अर्धा ते पाऊण तास वेळ लागतो. तेवढाच वेळ परत जाण्यासाठी लागत असल्याने कॉल केल्यानंतर रुग्णवाहिका तातडीने मिळेल, याची शाश्वती नाही. कधी-कधी दोन, दोन तास रुग्णवाहिका उपलब्ध होऊ शकत नाही.

००००

कोणत्या महिन्यात किती रुग्णांची वाहतूक

महिनाइतर रुग्ण कोरोना

जानेवारी १०९६ २७१

फेबुवारी १३५५ २५९

मार्च १४१ २०१६

००००

एकूण रुग्णवाहिका ११

००

दररोज येणारे कॉल्स

शहरातून येणारे कॉल ३५ टक्के

ग्रामीण भागातून येणारे कॉल ६५ टक्के

००००

कॉल केल्यानंतर एका, एका तासाने रुग्णवाहिका हजर

रुग्णसंख्या वाढत असल्याने १०८ रुग्णवाहिकेतून रुग्णांना सतत कोविड केअर सेंटर किंवा दवाखान्यापर्यंत पोहोचविण्यात येत आहे. जोपर्यंत पहिल्या रुग्णाला कोविड केअर सेंटरपर्यंत पोहोचवून दिले जात नाही, तोपर्यंत रुग्णवाहिका उपलब्ध होत नाही.

कधी कधी तर कॉल केल्यानंतर दोन तासातही रुग्णवाहिका उपलब्ध होत नसल्याचे प्रकार यापूर्वी घडले आहेत. रुग्णवाहिका जागेवर असेल तर कॉल केल्यानंतर अर्ध्या तासात उपलब्ध होऊ शकते.

रुग्ण वाढत असल्याने आणि रुग्णवाहिकांची संख्या अपुरी पडत असल्याने वेळेवर रुग्णवाहिका उपलब्ध न झाल्यास शहरी भागातील अनेकजण खासगी रुग्णवाहिकेची सेवा घेतात.

०००००

१०८ रुग्णवाहिकेची मागणी

जिल्ह्यात रुग्णसंख्या वाढत असल्याने आणि त्या तुलनेत पूर्वीच्याच ११ रुग्णवाहिका उपलब्ध असल्याने साहजिकच रुग्णवाहिकेसाठी वेटिंगवर राहण्याची वेळ आली आहे. त्यामुळे जिल्ह्यासाठी १०८ रुग्णवाहिका आणखी उपलब्ध कराव्यात, अशी मागणी समोर येत आहे.