माणुसकी झाली कलंकित; ५७ वर्षीय नराधमाचा गतिमंद मुलीवर अत्याचार

अशीच संतापजनक घटना ढाणकी शहराजवळ घडली असून येथे चिमुकलीचा चुलत काकाने विनयभंग केला.

यवतमाळ : सैतान अंगात शिरल्यानंतर माणुसकी उरतेच कुठे? वडकी परिसरात अशाच एका ५७ वर्षीय नराधमाने अल्पवयीन मुलीवर अत्याचार केला. त्याला परिसरातील शेतकऱ्यांसह महिलांनी पकडून पोलिसांच्या ताब्यात दिले. अशीच संतापजनक घटना ढाणकी शहराजवळ घडली असून येथे चिमुकलीचा चुलत काकाने विनयभंग केला. या प्रकरणी आरोपी काकाला आदिलाबाद येथून अटक करण्यात आली आहे.

गतिमंद मुलीवर अत्याचार करणाऱ्या आरोपीचे नाव बंडू श्यामराव महाजन (५७) असे असल्याचे पोलिसांनी सांगितले. या नराधमाने परिसरातीलच एका गावातील एका अल्पवयीन गतिमंद मुलीला बळजबरीने मोटरसायकलवर बसविले. तेथून ५०० मीटर अंतरावर असलेल्या बेंबळा प्रकल्पाच्या मुख्य कालव्यावर मोटरसायकल थांबवून तो तिला बेंबळा कॅनॉलच्या बाजूला घेऊन गेला. तेथे शेतातील निर्जनस्थळी निंबाच्या झाडाखाली त्याने अत्याचाराचा प्रयत्न केला. ही घटना एका मुलीने पाहिली, तिने तत्काळ घटनेची माहिती कपाशीची लागवड करीत असलेल्या मजुरांना दिली. शेतकऱ्यासह मजूर तत्काळ घटनास्थळी पोहोचले. त्यांनी नराधमास पकडून पोलिसांना पाचारण केले. वडकी पोलिसांनी घटनास्थळी पोहोचून आरोपीला ताब्यात घेतले.

पीडितेच्या नातेवाईकांनी दिलेल्या तक्रारीची चौकशी केल्यानंतर तपास अधिकारी रामेश्वर वैजने यांनी कलम ३७६ (२) आय, ३७६ (जे), ३७६ (एल) भादंवि सहकलम ४, ६, पोक्सो कायदा २०१२ सहकलम ३ (२) (व्ही) अनुसूचित जाती व अनुसूचित जमाती अत्याचार अशा विविध कलमान्वये गुन्हा दाखल करून आरोपीस अटक केली. या प्रकरणात आणखी कोणी आरोपी आहे का, याचाही तपास करण्याची गरज नागरिकांतून व्यक्त होत आहे.

चॉकलेटचे आमिष दाखवून बळजबरीचा प्रयत्न

ढाणकीपासून जवळच असलेल्या एका गावात माणुसकीला काळीमा फासणारी घटना सोमवारी सायंकाळी ५:३० च्या सुमारास घडली. चिमुकली मुलगी घराजवळ खेळत असताना २२ वर्षीय चुलत काकाने तिला चॉकलेटचे आमिष दाखविले आणि जवळच्या शेतात नेले. चिमुकलीला शेतात नेताना एकाने पाहिले, हा मुलीला कुठे घेऊन जात आहे, हे पाहण्यासाठी तो त्याच्या मागे गेला असता नराधम चिमुकलीसोबत बळजबरी करण्याचा प्रयत्न करीत होता. पाठीमागून आलेल्या व्यक्तीला पाहताच आरोपीने पळ काढला. या प्रकरणी मुलीच्या आई-वडिलांनी बिटरगाव पोलिस ठाणे गाठून तक्रार दिली. सदर आरोपी काकाला आदिलाबाद येथून अटक करण्यात आली आहे. त्याच्याविरुद्ध विनयभंगासह पोक्सोअंतर्गत गुन्हा नोंदविण्यात आला.