उमरखेड दगडफेकीत संशयितांची धरपकड

गणेश विसर्जन मिरवणुकीवर दगडफेक करणाऱ्या संशयितांची उमरखेड पोलिसांनी धरपकड सुरू केली आहे.

महानिरीक्षक दाखल : अतिरिक्त पोलीस कुमक तैनात, विसर्जन आटोपले
उमरखेड : गणेश विसर्जन मिरवणुकीवर दगडफेक करणाऱ्या संशयितांची उमरखेड पोलिसांनी धरपकड सुरू केली आहे. आतापर्यंत ३५ जणांना ताब्यात घेण्यात आले. दरम्यान गुरुवारच्या घटनेनंतर उमरखेडमधील सर्व प्रमुख सार्वजनिक गणेश मंडळाच्या मिरवणुका आणि गणेश विसर्जन शांततेत पार पडले.
छावा गणेशोत्सव मंडळाच्या मिरवणुकीवर उमरखेडमधील ताजपुरा मार्गावर गुरुवारी सायंकाळी तुफान दगडफेक करण्यात आली होती. त्यात पाच पोलिसांसह १६ जण जखमी झाले. पोलिसांना हवेत गोळीबार करुन परिस्थिती नियंत्रणात आणावी लागली होती. पोलिसांनी या प्रकरणी खुनाचा प्रयत्न, शासकीय कामात हस्तक्षेप या सारखे गंभीर गुन्हे दाखल करून रात्रीपासूनच संशयितांची धरपकड सुरू केली होती. आतापर्यंत ३५ जणांना पोलिसांनी ताब्यात घेतले आहे. घटनास्थळी पोफाळी, पुसद, महागाव, बिटरगाव, दिग्रस, दारव्हा, यवतमाळ तसेच शेजारील जिल्ह्यातून अतिरिक्त पोलीस कुमक मागविण्यात आली आहे. अमरावती परिक्षेत्राचे विशेष पोलीस महानिरीक्षक विठ्ठल जाधव, अपर जिल्हाधिकारी लक्ष्मण राऊत, जिल्हा पोलीस अधीक्षक अखिलेशकुमार सिंह, राज्य गुप्तवार्ता विभागाच्या नागपूर येथील उपायुक्त अनिता पाटील आदी घटनास्थळी दाखल झाले आहेत. रात्री अज्ञात समाजकंटकांनी बसस्थानक आणि ढाणकी रोडवर दोन दुकानांची जाळपोळ केली. त्यात लाखोंचे नुकसान झाले. दगडफेक व जाळपोळीच्या पार्श्वभूमीवर शुक्रवारी उमरखेडमधील बाजारपेठ, शाळा-महाविद्यालये दिवसभर बंद होती. या घटनेमुळे उमरखेडमधील जनजीवन विस्कळीत झाल्याचे चित्र पहायला मिळाले. दरम्यान उमरखेड शहरातील अन्य सार्वजनिक गणेशोत्सव मंडळाच्या मिरवणुका सकाळी ११ वाजेपर्यंत नांदेड रोडवरील पैनगंगा नदीवर पोहोचल्या होत्या. तेथे सर्व मंडळांच्या श्रीगणेशाचे विसर्जन पार पडले. उमरखेडचे आमदार राजेंद्र नजरधने यांनी सुरुवातीला दगडफेक करणाऱ्यांची अटक झाल्याशिवाय एकही गणपती जाग्यावरुन हलणार नाही, अशी भूमिका घेतली होती. त्यामुळे पोलिसांची कोंडी झाली. नंतर नजरधने यांनी गणेश मंडळाच्या कार्यकर्त्यांची बैठक घेऊन त्यांची समजूत काढली व शांततेचे आवाहन केल्याने तणाव निवळला. शहरात मुख्य मार्गावर ठिकठिकाणी थांबलेल्या गणेश मंडळांच्या मिरवणुका पहाटे ३ वाजता आमदार नजरधने यांच्या मध्यस्थीने मार्गस्थ झाल्या. (शहर प्रतिनिधी)

घटनास्थळी पोलिसांची तर रुग्णालयात डॉक्टरांची कमतरता
उमरखेडमधील दगडफेकीच्या घटनेच्या निमित्ताने पोलीस आणि आरोग्य विभागातील मनुष्यबळाची कमतरताही उघड झाली. ज्या ताजनगर मार्गावर दगडफेक झाली तेथे पोलिसांची संख्या कमी होती. डीजेच्या तालावर गणेश भक्त थिरकत असताना अचानक दगडफेक सुरू झाली. त्यामुळे पोलिसांचाही गोंधळ उडाला. नेमके काय होत आहे आणि काय करावे हे कुणालाच समजेनासे झाले होते. शहरात या घटनेची वार्ता पसरताच अनेक गणेश मंडळांनी आपली मिरवणूक जागच्या जागीच थांबली. घटनास्थळी पोलिसांचे मनुष्यबळ कमी असल्याने परिस्थितीवर नियंत्रण मिळविताना उपलब्ध यंत्रणेला बरीच कसरत करावी लागली. या दगडफेकीत जखमींना शासकीय रुग्णालयात नेले असता तेथेही डॉक्टर व आरोग्य कर्मचाऱ्यांची कमतरता जाणवली. त्यामुळे जखमींना काही वेळ उपचारासाठी प्रतीक्षा करावी लागली.