ट्रॅक्टरवर धडकून बसचालक ठार

पांढरकवडा मार्गावर वटबोरीजवळ एसटी बस शुक्रवारी सकाळी ९.३० वाजता ट्रॅक्टर ट्रॉलीवर धडकली. यात बसचालकाचा जागीच मृत्यू झाला. तर २१ प्रवासी जखमी झाले. जखमींना यवतमाळ शासकीय रुग्णालयात दाखल केले.

ठळक मुद्दे२१ जखमी : यवतमाळ-पांढरकवडा मार्गावर वटबोरीजवळ अपघात

लोकमत न्यूज नेटवर्क
यवतमाळ : पांढरकवडा मार्गावर वटबोरीजवळ एसटी बस शुक्रवारी सकाळी ९.३० वाजता ट्रॅक्टर ट्रॉलीवर धडकली. यात बसचालकाचा जागीच मृत्यू झाला. तर २१ प्रवासी जखमी झाले. जखमींना यवतमाळ शासकीय रुग्णालयात दाखल केले.
अजय रामदुलारे श्रीवास (५९) रा. शिंदेनगर यवतमाळ मृताचे नाव आहे. पांढरकवडा आगाराची बस (एम.एच.०६ एस ८८२४) यवतमाळवरून प्रवासी घेऊन पांढरकवडाकडे निघाली. वटबोरी गावासमोरच्या वळणावर बसची ट्रॅक्टरला धडक बसली. यात विटा भरलेली ट्रॅक्टर ट्रॉली थेट एसटी चालकाच्या बाजूने आदळली. यात अजय श्रीवास यांचा जागीच मृत्यू झाला. तर २१ प्रवासी जखमी झाले. स्थानिक गावकऱ्यांच्या मदतीने जखमींना रुग्णालयात नेण्यात आले.
निवृत्तीच्या तोंडावर मृत्यू
एसटीमध्ये बसचालक म्हणून अजय श्रीवास यांनी दीर्घ सेवा दिली होती. या काळात कुठलाही अपघात त्यांच्या हातून घडला नाही. निवृत्तीला जेमतेम महिनाभराचा कालावधी शिल्लक असताना त्यांच्या बसला अपघात होऊन त्यांचा मृत्यू झाला.