चालकाचे हातपाय बांधून मध्यरात्री चक्क औषधाचा कंटेनरच लुटला

हैद्राबाद येथून रेड्डीज कंपनीचा औषधसाठा घेऊन एच.आर.४७-डी.९२१९ क्रमांकाचा कंटेनर नागपूरकडे निघाला. बुधवारी रात्री १२.३० वाजताच्या सुमारास हा कंटेनर पांढरकवडालगतच्या मराठवाकडी या गावाजवळ पोहोचला. यावेळी अचानक एका ट्रकने या कंटेनरला ओव्हरटेक केले. त्यानंतर तो ट्रक कंटेनरसमोर थांबला. याचवेळी मागून पांढऱ्या रंगाचे चारचाकी वाहन आले. त्यातून तीन ते चार लुटारू खाली उतरले. त्यांनी  चालकांना बांधून कंटेनर पळवून नेला.

लोकमत न्यूज नेटवर्क
पांढरकवडा : हैदराबाद येथून औषधांचे बॉक्स घेऊन नागपूरकडे निघालेला कंटेनर राष्ट्रीय महामार्गावरील मराठवाकडी गावालगत लुटण्यात आल्याची थरारक घटना पांढरकवडालगत असलेल्या मराठवाकडी येथे बुधवारी मध्यरात्रीनंतर घडली. लुटारूंनी यावेळी कंटेनरमध्ये असलेल्या दोनही चालकांचे हातपाय बांधून शेतात फेकले. त्यानंतर कंटेनर काही अंतरावर नेऊन त्यातील औषधांचा साठा दुसऱ्या ट्रकमध्ये भरून हे लुटारू फरार झाले. सायंकाळी उशिरापर्यंत याप्रकरणी पांढरकवडा पोलिसांनी गुन्हा दाखल केला नव्हता. 
कंटेनरमधून नेमका किती औषधसाठा लंपास झाला, याचे मोजमाप सायंकाळपर्यंत सुरू होते. दरम्यान, औषध कंपनीचे अधिकारी पांढरकवडा पोलीस ठाण्यात दाखल झाले होते. मिळालेल्या माहितीनुसार, हैद्राबाद येथून रेड्डीज कंपनीचा औषधसाठा घेऊन एच.आर.४७-डी.९२१९ क्रमांकाचा कंटेनर नागपूरकडे निघाला. बुधवारी रात्री १२.३० वाजताच्या सुमारास हा कंटेनर पांढरकवडालगतच्या मराठवाकडी या गावाजवळ पोहोचला. यावेळी अचानक एका ट्रकने या कंटेनरला ओव्हरटेक केले. त्यानंतर तो ट्रक कंटेनरसमोर थांबला. याचवेळी मागून पांढऱ्या रंगाचे चारचाकी वाहन आले. त्यातून तीन ते चार लुटारू खाली उतरले. त्यांनी  चालकांना बांधून कंटेनर पळवून नेला.  काही वेळानंतर चालकांनी कशीबशी स्वत:ची सुटका करत या घटनेबाबत संबंधित कंपनीच्या अधिकाऱ्यांना माहिती दिली. त्यानंतर पोलीस ठाण्यात जाऊन पोलिसांनाही या घटनेबाबत अवगत केले. लुटण्यात आलेला कंटेनर पोलीस ठाण्यात लावण्यात आला असून त्यातील नेमका किती औषधासाठा लुटारूंनी लंपास केला, याची मोजदाज सायंकाळपर्यंत सुरू होती. घटनेची माहिती मिळताच, अपर पोलीस अधीक्षक खंडेराव धरणे यांच्यासह एलसीबी व सायबर सेलचे पथक दाखल झाले. लुटारू नेमक्या कोणत्या मार्गाने पसार झाले, याची माहिती घेणे सुरू आहे.  तपास एपीआय विजय महल्ले, पोलीस शिपाई वसंत चव्हाण, शंकर बोरकर करीत आहेत. 

अशी केली सिनेस्टाईल लूट; अर्धा किमी अंतरावर दुसऱ्या ट्रकमध्ये भरली औषधे

- लुटारूंनी कंटेनरच्या केबिनचा ताबा घेत, कंटेनरमध्ये बसून असलेल्या लखन जसराम जाटाव (२४) रा.कालोडी (मध्यप्रदेश) व बलीचंद सेन रा. मध्य प्रदेश या दोघांच्याही डोळ्यावर जबरदस्तीने पट्ट्या बांधल्या. त्यानंतर या दोघांनाही कंटेनरच्या खाली उतरवरून लगतच्या शेतात नेले. तेथे त्यांचे हातपाय बांधले. 
- लुटारूंपैकी दोघे या चालकांजवळ जवळपास अर्धा तास थांबून होते. यादरम्यान उर्वरित लुटारूंनी औषधाने भरलेला कंटेनर तेथून पाच किलोमीटर अंतरावर पुढे असलेल्या कोंघारा या गावालगत नेला. तेथे कंटेनर थांबवून त्यातील औषधांचा साठा दुसऱ्या ट्रकमध्ये भरून लुटारू पळाले.

महामार्गावरील महिन्यातील लुटमारीची दुसरी घटना
- गेल्या महिनाभरातील या मार्गावर घडलेली ही लुटमारीची दुसरी घटना आहे. तीन आठवड्यांपूर्वी रात्रीच्या वेळी करंजी मार्गावरील साखरा गावालगत एका ट्रकचालकाला अशाच पद्धतीने हातपाय बांधून शेतात सोडण्यात आले. त्यानंतर लुटारूंनी त्या ट्रकची सहा चाके पळवून नेली. सातत्याने घडणाऱ्या या घटनांमुळे राष्ट्रीय महामार्गावर लुटारूंची दहशत निर्माण झाली आहे.

धावत्या कंटेनरवर दरोडा टाकल्याप्रकरणी गुन्हे दाखल करण्याची प्रक्रिया सुरू आहे. लुटारूंचा शोध घेतला जात आहे. नेमका किती मुद्देमाल लुटारूंनी नेला, याची तपासणी सुरू आहे. 
- जगदीश मंडलवार
ठाणेदार, पांढरकवडा पोलीस ठाणे