पुतणीच्या लग्नात द्यायचे होते आंदण... अन् नवरा-बायकोचे पेटले भांडण

लग्नसमारंभाच्या आंदणावरून पती-पत्नीत पेटलेले भांडण सध्या चर्चेचा विषय ठरले आहे.

यवतमाळ : नवरा-बायकोच्या संसारात खर्चाच्याबाबतीत दोघांचीही मर्जी महत्त्वाची असते. दोनपैकी एक पारडे जड झाले की वाद पेटतो. हाच प्रकार एका लग्नसमारंभात उद्भवला. नवऱ्याला न विचारता बायकोने आंदण (प्रेझेंट) खरेदीसाठी खर्च केला. त्यातून नवरा-बायकोचे भांडण पेटले आणि बायकोला गंभीर मारहाण करण्यात आली.

घरातून सुरू झालेला आणि पोलीस ठाण्याच्या पायरीपर्यंत पोहोचलेला हा प्रकार बाभूळगाव तालुक्यातील सरूळ गावात रविवारी दुपारी घडला. दिगांबर शंकरराव श्रीरामे (वय ४१) आणि सुरेखा दिगांबर श्रीरामे (३६) अशी या पती-पत्नीची नावे आहेत. झाले असे की, या दाम्पत्याच्या पुतणीचे रविवारी लग्न होते. त्यासाठी पुतणीला चांगले प्रेझेंट देण्याचे नियोजन करण्यात आले.

मात्र, या खरेदीमध्ये दिगांबर श्रीरामे यांची नाराजी झाली. मला न सांगता पुतणीसाठी प्रेझेंट कसे खरेदी केले? त्या प्रेझेंटसाठी पैसे कुठून आणले? या कारणावरून दिगांबर आणि सुरेखा यांच्यात भांडण झाले. दिगांबरने रागाच्या भरात पत्नीला लाकडी राॅप्टरने मारहाण केली. यात सुरेखाच्या डोक्याला मागील बाजूने गंभीर दुखापत झाली. या प्रकरणात सुरेखाने बाभूळगाव पोलीस ठाणे गाठून पतीविरुद्ध मारहाणीची तसेच जिवे मारण्याची धमकी दिल्याची तक्रार नोंदविली. पोलिसांनी दिगांबर श्रीरामे याच्याविरुद्ध गुन्हा नोंदविला. लग्नसमारंभाच्या आंदणावरून पती-पत्नीत पेटलेले भांडण सध्या चर्चेचा विषय ठरले आहे.