राष्ट्रवादीच्या अध्यक्षपदी ख्वाजा बेग

राष्ट्रवादी काँग्रेसच्या यवतमाळ जिल्हाध्यक्षपदी अखेर विधान परिषद सदस्य ख्वाजा बेग यांची नियुक्ती करण्यात आली. मंगळवारी बेग यांच्या नियुक्तीचे आदेश जारी करण्यात आले. यवतमाळसह १४ जिल्ह्यांच्या नियुक्त्या अनेक महिन्यांपासून रखडल्या होत्या. त्यावर अखेर तोडगा निघाला.

ठळक मुद्देआधी आमदारकी, आता जिल्ह्याचीही जबाबदारी : घुईखेडकर, ठोकळ, गाडबैले बाद

लोकमत न्यूज नेटवर्क
यवतमाळ : राष्ट्रवादी काँग्रेसच्या यवतमाळ जिल्हाध्यक्षपदी अखेर विधान परिषद सदस्य ख्वाजा बेग यांची नियुक्ती करण्यात आली. मंगळवारी बेग यांच्या नियुक्तीचे आदेश जारी करण्यात आले. यवतमाळसह १४ जिल्ह्यांच्या नियुक्त्या अनेक महिन्यांपासून रखडल्या होत्या. त्यावर अखेर तोडगा निघाला.
यवतमाळचे जिल्हाध्यक्षपद नानाभाऊ गाडबैले यांच्याकडे होते. परंतु दोन टर्मनंतर त्यांचा कार्यकाळ संपला. त्यानंतर नव्या जिल्हाध्यक्षाचा राष्ट्रवादीमध्ये शोध सुरू झाला. वसंत घुईखेडकर, सुभाष ठोकळ, ख्वाजा बेग, उत्तमराव शेळके, राजू पाटील अशी काही नावे चर्चेत होती. नानाभाऊ गाडबैले यांना रिपीट करावे, असाही काहींचा आग्रह होता. नावांबाबत एकमत होत नसल्याने जिल्हाध्यक्षांची ही नियुक्ती गेली काही महिने साईडला पडली होती. अलिकडेच राष्ट्रवादीचे नेते अजित पवार यांनी जिल्ह्यातील पक्षाच्या प्रमुख पदाधिकाऱ्यांची बैठक बोलविली. त्यात घुईखेडकर की ठोकळ या पैकी एकाचा निर्णय होणार होता. मात्र घुईखेडकरांच्या नावाला पक्षातील एका नेत्याने विरोध दर्शविला. त्याच वेळी दुसऱ्या नावाच्या समर्थकांची बैठकीतील ‘अभद्र वागणे’ अजितदादांना चांगलेच खटकले. त्यांनी या समर्थकांची झाडाझडती घेतली. त्यामुळे ही दोन्ही नावे बाद झाली आणि गाडबैले यांना रिपीट करायचे नव्हते, म्हणून ख्वाजा बेग यांचे नाव पुढे आले.
अल्पसंख्यकांना पाठबळ
यवतमाळात काँग्रेसचे अध्यक्षपद डॉ. वजाहत मिर्झा यांच्याकडे आहे. त्यामुळे काँग्रेसला काऊंटर करण्यासाठी राष्ट्रवादी काँग्रेसचे जिल्हाध्यक्षपद ख्वाजा बेग यांना द्यावे, असा विचार पुढे आला. त्याचा आगामी लोकसभा व विधानसभा निवडणुकांमध्ये फायदा होईल, राष्ट्रवादीसुद्धा अल्पसंख्यकांच्या मागे असल्याचा संदेश जाईल, असे नेत्यांना पटवून सांगण्यात आले. त्याबाबत एकमत झाल्याने अखेर आमदार ख्वाजा बेग यांची राष्ट्रवादी काँग्रेसच्या यवतमाळ जिल्हाध्यक्षपदी नियुक्ती करण्यात आली.
बेग यांच्या नेतृत्वात जिल्ह्यात राष्ट्रवादी काँग्रेस लोकसभा व विधानसभेच्या निवडणुका लढणार आहे. त्यांची नियुक्ती काँग्रेसला काऊंटर करण्यात तसेच अल्पसंख्यकांना आपल्याकडे खेचण्यात कितपत उपयोगी ठरते, हे काळच ठरवेल.
तीन विधानसभा मतदारसंघांवर दावा
जिल्ह्यात विधानसभेच्या सात पैकी पुसदची जागा आमदार मनोहरराव नाईक यांच्या रुपाने राष्ट्रवादीकडे आहे. आगामी विधानसभेच्या दृष्टीने राष्ट्रवादीने यवतमाळ, दिग्रस-दारव्हा व वणी मतदारसंघावर दावा सांगितला आहे. त्यापैकी काँग्रेसकडून दिग्रस-दारव्हा मतदारसंघ राष्ट्रवादीसाठी सहज सोडला जाण्याची शक्यता नाकारता येत नाही. विधान परिषदेचे विरोधी पक्ष नेते धनंजय मुंडे हे मित्र प्रेमापोटी वणीतील जागेसाठी प्रचंड आग्रही आहेत. वणीतील जागेसाठी आपली परळीची जागा सोडण्याची तयारीही त्यांनी दर्शविली होती. त्यांचा हट्ट कायम राहिल्यास दिग्रस-दारव्हा ऐवजी वणीची जागा राष्ट्रवादीला वाटाघाटीत सुटण्याची शक्यता राजकीय गोटात वर्तविली जात आहे. वणीत काँग्रेस मात्र कोणत्याही परिस्थिती जागा सोडणार नाही, अशा भूमिकेत आहे. सोबतच जिल्ह्यात पुसद वगळता राष्ट्रवादी काँग्रेसची ताकदच किती, असा सवालही काँग्रेसच्या गोटातून उपस्थित केला जात आहे.
लोकसभेतही ‘चेंज’ची चाचपणी
यवतमाळ-वाशिम लोकसभा मतदारसंघात काँग्रेसचा सातत्याने पराभव होत आहे. त्यापूर्वी राष्ट्रवादीलाही वाशिममध्ये पराभवाचा सामना करावा लागला होता. त्यामुळे यावेळी लोकसभा मतदारसंघात चेंज करता येईल का या दृष्टीनेही राष्ट्रवादीची चाचपणी सुरू असल्याची माहिती आहे.
जिल्हाभर पक्षसंघटन खिळखिळे, नवसंजीवनीचे आव्हान
जिल्ह्यात राष्ट्रवादी काँग्रेसचे संघटन खिळखिळे झाले आहे. नाईकांमुळे पुसदमध्ये काय ती तेवढी राष्ट्रवादीची ताकद आहे. पक्षाची आंदोलने नाही, कार्यक्रम नाही, मेळावे नाही, पक्षाच्या कार्यालयात कायम शुकशुकाट असे विदारक चित्र जिल्ह्यात राष्ट्रवादीचे आहे. जिल्हा परिषदेत राष्ट्रवादी एका सभापतीपदावर सत्तेत असली तरी त्यातही दहा सदस्यांच्या एकजुटीमुळे पुसदचा गट स्ट्राँग झाला आहे. गटनेता बदलवून या नाराज दहा सदस्यांच्या पाठीशी आपण भक्कमपणे उभे असल्याचे तेथील राष्ट्रवादीच्या नेत्यांनी दाखवून दिले आहे. जिल्ह््यात राष्ट्रवादी काँग्रेस अनेक तालुकास्तरावर नामफलकापुरती उरली आहे. कित्येक गावात तर फलकेही नाहीत. वणीपासून उमरखेडपर्यंत कुठेच राष्ट्रवादीची ताकद नाही. कधी काळी यवतमाळात दिसणारी गर्दीही विधानसभा निवडणुकीत उमेदवाराला मिळालेल्या मतांची आकडेवारी पाहून केव्हाच ओसरली आहे. पक्षाच्या उमेदवाराला शहरात मिळालेली दोन-चार हजार मते लक्षात घेता यवमाळात पक्षाची अवस्था काय याची कल्पना येते. त्यामुळे राष्ट्रवादी काँग्रेसचे जिल्हाध्यक्षपद आमदार ख्वाजा बेग यांच्यासाठी मोठे आव्हान ठरले आहे. लोकसभा निवडणुकांना किमान सहा महिने अवधी असल्याने या काळात त्यांना पक्षबांधणीसाठी प्रचंड परिश्रम घ्यावे लागणार आहे. त्यात त्यांना पुसद व यवतमाळच्या दोनही प्रमुख नेत्यांची कशी साथ मिळते यावरसुद्धा पक्षाचे यश-अपयश व बांधणी अवलंबून आहे. त्यांना नेत्यांकडून पूर्ण स्वातंत्र्य मिळाल्यास ख्वाजा बेग निश्चितच जिल्हाभर राष्ट्रवादी काँग्रेस पक्ष बळकट करतील अशी सामान्य कार्यकर्त्यांची भावना आहे.
राष्ट्रवादीने दिला काँग्रेसला ‘चेकमेट’
काँग्रेसचे जिल्हाध्यक्षपद डॉ. वजाहत मिर्झा यांच्या रुपाने अल्पसंख्यकाकडे आहे. त्यातच त्यांना विधान परिषदेचे सदस्य पदही देण्यात आले. या माध्यमातून काँग्रेस अल्पसंख्यकांच्या आणखी जवळ जाण्याचा प्रयत्न करीत असल्याचे पाहून राष्ट्रवादीनेही काँग्रेसला काऊंटर करण्यासाठी पक्षाचे जिल्हाध्यक्षपद ख्वाजा बेग यांना दिले. बेग यांना यापूर्वीच आमदारकी देण्यात आली आहे. त्यांच्या आमदारकीचे राष्ट्रवादीने जिल्हाभर मार्केटिंगही केले होते. धर्मनिरपेक्ष काँग्रेस व राष्ट्रवादीचे जिल्हाध्यक्षपद आमदार असलेल्या अनुक्रमे मिर्झा व बेग यांच्याकडे आल्याने जिल्हाभरातील अल्पसंख्यकांमध्ये समाधान व्यक्त केले जात आहे.