मारेगावात रिव्हाॅल्वरच्या धाकावर डाॅक्टरचे अपहरण, तीन लाख रूपये घेऊन लुटारू फरार

मारेगाव पोलीस ठाण्यात गुन्हा दाखल

संतोष कुंडकर

वणी (यवतमाळ) : रुग्णालयातील काम आटोपून स्कुटीने मारेगावकडे येणाऱ्या एका डाॅक्टरला रिव्हाॅल्वरच्या धाकावर अडविले. त्यानंतर त्याला कारमध्ये बसवून वणीत आणण्यात आले. येथे डाॅक्टरने मित्राकडून तीन लाख रुपये घेऊन ते अपहरणकर्त्यांना दिले. त्यानंतर अपहरणकर्त्यांनी डाॅक्टरला मारेगाव मार्गाने परत नेऊन वाटेत सोडून दिले. ही थरारक घटना सोमवारी (दि.१३) सायंकाळी ७.३० वाजताच्या सुमारास घडली. याप्रकरणी मारेगाव पोलीस ठाण्यात चार अज्ञात लुटारूंविरूद्ध गुन्हा दाखल करण्यात आला आहे.

डाॅ. प्रोवेश हाजरा (४८) असे अपहरण झालेल्या डाॅक्टरचे नाव आहे. मारेगाव तालुक्यातील नवरगाव येथे त्यांचे क्लिनिक आहे. नेहमीप्रमाणे सोमवारी सायंकाळी ओपीडी आटोपून स्कुटीद्वारे ते मारेगावकडे येत असताना ७.३० वाजताच्या सुमारास मारेगाव-यवतमाळ मार्गावरील करणवाडीजवळ असलेल्या पेट्रोलपंपालगत मागून आलेल्यास्विफ्ट कारने त्यांना अडविले. त्यातून उतरलेल्या एकाने डाॅ.हाजरा यांच्या डोक्याला रिव्हाॅल्वर लावून कारमध्ये बसण्यास सांगितले.

डाॅक्टर हाजरा यांना कारमध्ये बसविल्यानंतर अपहरणकर्त्यांची कार मारेगावकडे निघाली. कारमधील चारजणांपैकी एकाने डाॅक्टरची स्कुटी घेतली. नंतर मारेगावजवळ रस्त्याच्या कडेला स्कुटी सोडून देण्यात आली. या अपहरणकर्त्यांनी डाॅक्टरला जीवे मारण्याची धमकी देत पाच लाखांची मागणी केली. त्यावर डाॅक्टरने माझ्याकडे एवढी रक्कम नाही. मात्र वणी येथील मित्राकडून तीन लाख रूपये घेऊन तुम्हाला देतो, असे अपहरणकर्त्यांना सांगितले. त्यानंतर डाॅक्टरला घेऊन ही कार वणीतील शेवाळकर परिसरात पोहोचली. डाॅ.हाजरा यांनी मोबाईलवरून मित्राशी संपर्क साधून तीन लाख रूपये मागितले. मित्राने ही रक्कम तातडीने शेवाळकर परिसरात पोहोचविली.

पैसे मिळताच अपहरणकर्ते डाॅक्टरला घेऊन पुन्हा मारेगावकडे निघाले. वाटेत डाॅक्टरच्या गळ्यातील सोन्याची साखळी, हातातील अंगठीही काढून घेतली. त्यानंतर वणी-मारेगाव दरम्यान असलेल्या निंबाळा गावाजवळ डाॅक्टरला सोडून देऊन अपहरणकर्ते मारेगावच्या दिशेने निघून गेले. दरम्यान, डाॅ.हाजरा यांनी घडलेल्या घटनेची तक्रार मारेगाव पोलीस ठाण्यात दाखल केली. तक्रारीवरून पोलिसांनी अपहरणकर्त्यांविरूद्ध विविध कलमान्वये गुन्हा दाखल केला. पोलिसांकडून अपहरणकर्त्यांचा शोध सुरू आहे.