एक बात बतानी हैं आनेवाली नसलो को...

एका मुस्लीम युवकाला वाटले, आपल्या लग्नाची शहनाई म्हणजे राष्ट्रीय एकात्मतेचा बिगुल ठरावा.

मार्मिक लग्न पत्रिका : शेतकरी, सैन्य, पाणी, बेटी बचाओ, राष्ट्रीय एकात्मतेचा संदेश
अविनाश साबापुरे ल्ल यवतमाळ
छोटासा एक देस पडोसी
औकात को अपनी भुल गया
उसकी अकड को जड से मिटाकर
पिछला पाठ पढा देना...
बस एक बात बतानी हैं
आनेवाली नसलो को
अपनी रक्षा जो करते हैं
उनकी शान बढा देना...
ही कविता नव्हे, लग्नाच्या पत्रिकेवरचा मजकूर होय. एका मुस्लीम युवकाला वाटले, आपल्या लग्नाची शहनाई म्हणजे राष्ट्रीय एकात्मतेचा बिगुल ठरावा. त्याने दोन हजार पत्रिका वाटल्या अन् पत्रिका पाहणाऱ्या प्रत्येकाने ‘रिटर्न कॉल’ करून त्याच्या देशभक्तीला सलाम केला. ५ मे रोजी घाटंजीत होऊ घातलेल्या या लग्नाची पत्रिका म्हणजे उदात्त, उत्तम, महन्मंगल देश घडविण्याची दवंडीच. अन् ही दवंडी थेट राष्ट्रपती, पंतप्रधानांच्या कानांपर्यंत पोहोचली, हे विशेष!
घाटंजी येथील मेहवीश फातीमा आसमा परवीन या तरुणीचे लग्न वाईबाजार (ता. माहूर) येथील शेख मोहसीन शेख आमीन या युवकाशी होत आहे. तेही बिनहुंड्याने. सरकारी नोकरीत असलेला शेख मोहसीन माहुर, किनवटमध्ये मागासवर्गीयांच्या विकासाकरिता धडपडतो. त्याने छापलेली लग्नाची पत्रिका म्हणजे दहा पानांची पुस्तिकाच आहे.
पहिल्याच पानावर ‘वतन के रखवाले’ असे शीर्षक. लगेच सैनिकांच्या शौर्याला नमन करणारी कविता. पत्रिकेवरील हा मजकूर पाहताच लक्षात येते, हे लग्नाचे नुसते आवतन नव्हे; देशसेवेचे आवाहन होय! हिंदूइझम, जैनिझम, बुद्धीझम, इस्लाम, ख्रिश्चनिटी हे इंग्रजी शब्द अशा पद्धतीने छापण्यात आले आहेत, की ते वाचताना ‘इंडियन’ हा ठळक आणि एकमेव शब्द नजरेत भरतो. या पत्रिकेचे एक पान ‘बेटी बचाओ बेटी पढाओ’साठी दिले आहे. महात्मा गांधींच्या चष्म्याचा लोगो घेऊन स्वच्छ भारत मिशनचा आग्रहदेखील धरला आहे. डोईवर हात ठेवून आकाशाकडे बघणाऱ्या शेतकरी दाम्पत्याचे चित्र हे या पत्रिकेतील ‘करुण’ पान. ‘शेतावर कर्ज आहे हा छोटा आहे रे आजार, पण तू आत्महत्या केली ना बापू तुझं घर होईल रे बेजार’ या दोन ओळीही हृदयाला पाझर फोडतात. किनवट, माहूर, उमरखेडचे सहस्त्रकुंड अशा वृक्षराजींनी संपन्न मुलुखात काम करणाऱ्या शेख मोहसीनने ‘इन्ही दरख्तो से कायम वजूद हैं अपना’ म्हणत वृक्षप्रेमासाठी लग्नपत्रिकेचे एक पान वाहिले आहे. ‘हर शराबी को मैने नामुराद होते देखा हैं, नशे मे घरो को बरबाद होते देखा हैं’ अशा ओळींसह ‘संभल शराबी’ या शीर्षकाचे एक पान लक्षवेधी आहे. सामाजिक संदेश देता देता शेख मोहसीनने शेवटचे पान पुन्हा देशवासीयांना अर्पण केले. ते असे...
सज्जनाने वाचावी पोथी पुराणे नेमकी
आपण रंजल्यांचे दु:ख वाचूया,
तोडगा वादावरी वेडा तुम्हा हा सांगतो
मंदिरी रब अन् मशिदी राम ठेवूया.

अमित शहांकडून लग्नपत्रिकेची दखल
सामाजिक कार्यासाठी मी दोन वर्षांनी सरकारी नोकरीचा राजीनामा देईल, असे सांगतच शेख मोहसीनने लग्न जुळविले. हुंडा न घेता होणाऱ्या लग्नाच्या स्वागत समारंभाचे ‘डेकोरेशन’ फक्त सामाजिक संदेशांच्या फलकांनीच सजणार आहे. अण्णा हजारे, पोपटराव पवार यांना आदर्श मानणाऱ्या शेख मोहसीनने आपल्या लग्नाच्या पत्रिका थेट राष्ट्रपती प्रणव मुखर्जी, पंतप्रधान नरेंद्र मोदी, उपराष्ट्रपती हमीद अन्सारी, भाजपा अध्यक्ष अमित शाह, काँग्रेस अध्यक्ष सोनिया गांधी, गुलामनबी आझाद, मेहबुबा मुफ्ती, मुख्यमंत्री देवेंद्र फडणवीससह राज्याचे संपूर्ण मंत्रालय, डॉ. प्रकाश आमटे, शिवसेनेचे कार्याध्यक्ष उद्धव ठाकरे, मनसे प्रमुख राज ठाकरे अशा दिग्गजांना पाठविल्या आहेत. दोन हजार पत्रिका वाटल्यावर साधारण हजारेक लोकांनी फोन करून पत्रिकेला ‘फुल मार्क’ दिले. भाजपा अध्यक्ष अमित शाह यांच्या कार्यालयातून लगेच फोन आला, ‘अमित शाह आणि त्यांच्या टीमकडून लग्नाच्या दिवशी तुम्हाला शुभेच्छा संदेश प्राप्त होईल.’

ही पत्रिका, त्यासाठीचा मजकूर तयार करण्यासाठी तीन महिन्यांपासून माझे काम सुरू होते. या माध्यमातून जास्तीत जास्त लोकांपर्यंत माझ्या भावना पोहोचविण्याचा उद्देश होता. आता येणारे रिप्लाय बघता, समाधान वाटते.
- शेख मोहसीन शेख आमीन, नवरदेव