पोलीस शिपायाचा अपघातात मृत्यू

संदीप आत्राम हे जिल्हा पोलीस दलात २०११ ला शिपाई म्हणून दाखल झाले होते.

यवतमाळ: यवतमाळ जिल्ह्यातील राळेगाव पोलीस ठाण्यात कार्यरत संदीप तायाजी आत्राम (बक्कल नं.२३९२) या पोलीस शिपायाचा रात्री अपघातात मृत्यू झाला.

कामावरून कोंढी गावाकडे मोटरसायकलने (एम.एच.२९/एपी-५१९५) जात असताना पांढरकवडा पोलीस ठाण्याच्या हद्दीतील ताडउमरी येथे त्यांच्या वाहनाला अपघात झाला. रात्रभर संदीप अपघातस्थळीच पडून राहिल्याचे सांगितले जाते. संदीप आत्राम हे जिल्हा पोलीस दलात २०११ ला शिपाई म्हणून दाखल झाले होते. त्यांचा अपघात नेमका कसा झाला, हे मात्र अद्याप स्पष्ट होऊ शकले नाही. पांढरकवडा पोलीस याप्रकरणी अधिक तपास करीत आहे.