राळेगावमध्ये विजयी जल्लोष

तालुक्यात भारतीय जनता पक्षाने लक्षणीय विजय संपादन केला. याचा आनंद जंगी मिरवणूक काढून साजरा करण्यात आला.

राळेगाव : तालुक्यात भारतीय जनता पक्षाने लक्षणीय विजय संपादन केला. याचा आनंद जंगी मिरवणूक काढून साजरा करण्यात आला. जिल्हा परिषद आणि पंचायत समिती निवडणुकीत तालुक्याच्या इतिहासात भाजपाला पहिल्यांदाच हे यश मिळाले आहे.
उमेदवारांच्या विजयाची घोषणा होताच त्यांच्या समर्थकांनी गुलाल उधळून आनंद व्यक्त केला. यानंतर जिल्हा परिषद गटातील आणि पंचायत समिती गणातील विजयी उमेदवारांच्या सहभागात शहराच्या विविध भागातून रॅली काढण्यात आली. आमदार प्राचार्य डॉ. अशोक उईके, भाजपाचे माजी अध्यक्ष मोहनलाल गुंदेचा, भाजपा जिल्हा उपाध्यक्ष तथा नगरपरिषदेचे उपाध्यक्ष अ‍ॅड. प्रफुल्ल चौहान, नगराध्यक्ष बबन भोंगारे, नगरसेवक बाळासाहेब कवीश्वर, बाळासाहेब दिघडे, गोवर्धन वाघमारे आदी या मिरवणुकीत सहभागी झाले होते.
कार्यकर्त्यांचा विजय - अशोक उईके
राळेगाव तालुक्यात जिल्हा परिषद आणि पंचायत समिती निवडणुकीत मिळविलेल्या यशावर प्रतिक्रिया देताना आमदार प्राचार्य डॉ. अशोक उईके म्हणाले, हा विजय सर्व कार्यकर्त्यांच्या मेहनतीचा आणि एकजुटीचा होय. शिस्तबद्ध प्रचार, गट आणि गणांमध्ये घेतलेल्या सभा, केंद्र व राज्य सरकारने ग्रामीण जनतेसाठी घेतलेले निर्णय या जमेच्या बाजू राहिल्या. शिवाय उमेदवारांनी आपल्या गट आणि गणांमध्ये केलेल्या कार्याचाही हा विजय असल्याचे आमदार उईके म्हणाले. (प्रतिनिधी)