सावत्र मामाने केला वारंवार अत्याचार; अल्पवयीन भाचीने घेतले विष

Yawatmal News सावत्र मामाकडून झालेल्या सततच्या अत्याचाराने भाची गर्भवती झाली. त्यानंतर गोळ्या देऊन तिचा गर्भपात करण्यात आला. यातून होत असलेल्या त्रासाला कंटाळून पीडित अल्पवयीन भाचीने विष प्राशन केले.

लोकमत न्यूज नेटवर्क
यवतमाळ : सावत्र मामाकडून झालेल्या सततच्या अत्याचाराने भाची गर्भवती झाली. त्यानंतर गोळ्या देऊन तिचा गर्भपात करण्यात आला. यातून होत असलेल्या त्रासाला कंटाळून पीडित अल्पवयीन भाचीने विष प्राशन केले. ही घटना शिरपूर पोलीस ठाण्याच्या हद्दीतील कळमना येथे घडली. याप्रकरणी पोलिसांनी आरोपीला गुरुवारी भादंवि ३७६, (२) (एन) ५०६, सहकलम ४, ६, ८ पोक्सो ऐक्ट अन्वये गुन्हा दाखल करून अटक केली. (Repeated atrocities committed by step-uncle; Poison taken by a minor niece)

पिडित अल्पवयीन मुलगी ही शिरपूर पोलीस ठाण्याच्या हद्दीतील एका गावात आजीसोबत राहते. आरोपी सावत्र मामा हा मळचा राजूर (चंद्रपूर) येथे राहतो. मात्र गेल्या एक वर्षापासून तो पिडीत मुलीच्या गावाला पत्नीसह रहात होता. नातलग असल्याने पिडित मुलीचे सावत्र मामासोबत बोलणे व्हायचे. यातूनच त्याने तिच्याशी जवळिक साधण्याचा प्रयत्न केला.
एक दिवस घरी कुणी नसताना या मामाने तिच्यावर अत्याचार केला. हा प्रकार कुणाला सांगितला तर तिला व तिच्या वडिलांना ठार मारण्याची त्याने धमकीही दिली. जिवाच्या भीतीपोटी या मुलीने पुढे अनेक दिवस मामाचा अत्याचार सहन केला.

दरम्यान ती गरोदर असल्याचे लक्षात येताच, आरोपीने तिच्यावर दबाव टाकून तिला गर्भपाताच्या गोळ््या आणून दिल्या व गर्भपात करवला. मामाच्या या सततच्या अत्याचाराने त्रस्त होऊन तिने २० ऑगस्ट रोजी विष प्राशन केले. तिची प्रकृती गंभीर झाल्याने तिला चंद्रपूरला हलवण्यात आले.

उपचारानंतर तिने २५ ऑगस्ट रोजी शिरपूर पोलीस ठाणे गाठले. मात्र भीतीपोटी तिने तक्रार नोंदवली नाही. या घटनेचे गांभीर्य पाहता, २६ रोजी पोलिसांनी तिचे गाव गाठले व तिची तक्रार लिहून घेतली. पोलिसांनी आरोपी मामाविरुद्ध गुन्हा दाखल केला असून त्याला बेड्या ठोकल्या आहेत.