वाघाडी जांब येथे शिवसैनिकाचा भोसकून खून; आरोपी पसार

एक संशयित ताब्यात : यवतमाळनजीक वाघाडीत थरार

यवतमाळ : दिवाळीच्या सुट्या, त्यात क्रिकेट वर्ल्ड कपचे सेमी फायनल असा सर्व माहोल असताना शहरालगतच्या वाघाडी जांब येथे शिवसैनिकाची चाकूने भोसकून हत्या करण्यात आली. ही घटना गुरुवारी रात्री ८:३० वाजता घडली. घटनेची माहिती मिळताच ग्रामीण पोलिसांचे पथक तेथे पोहोचले. जागेवरच त्या शिवसैनिकाचा मृत्यू झाला होता. यामुळे परिसरात तणावाचे वातावरण निर्माण झाले होते.

योगेश काटपेलवार (३९) रा. देवीनगर लोहारा असे मृताचे नाव आहे. योगेशचा खून जुन्या वादातून झाला असावा, हा पोलिसांचा प्राथमिक अंदाज आहे. याेगेशचा मृतदेह घटनास्थळावरून शासकीय रुग्णालयात हलविण्यात आला. पोलिसांनी तत्काळ तपास हाती घेत मारेकरी कोण याची माहिती गोळा करण्यास सुरुवात केली. शिवाय घटनास्थळाच्या आजूबाजूला असलेल्या एका संशयितासह महिलेलाही चौकशीसाठी ताब्यात घेतले. तर या गुन्ह्यातील मुख्य मारेकरी चापडोह येथील असल्याचा प्राथमिक अंदाज वर्तविला जात आहे.

चापडोह येथे राहणाऱ्या महेश नामक युवकाने इतर साथीदारांना सोबत घेऊन हा गुन्हा केल्याचे सांगण्यात येत आहे. या प्रकरणात वृत्त लिहिस्तोवर तक्रार दाखल करण्यात आली नव्हती. यापूर्वीच पोलिसांनी खबऱ्यांमार्फत माहिती गोळा करणे, संशयितांची विचारपूस करणे याला सुरुवात केली होती. घटनास्थळी उपविभागीय अधिकारी संजय पुज्ज़लवार, ग्रामीण ठाणेदार प्रकाश तुणकलवार, सहायक निरीक्षक राहुल शेजव आदींनी भेट दिली.