पुसदमध्ये इराणी टोळी सक्रिय असल्याचा संशय

सध्या पुसद पोलीस उपविभागाअंतर्गत येणाऱ्या सर्व पोलीस ठाण्यांच्या हद्दीतील नागरिकांनी दक्ष व सतर्क राहण्याची गरज आहे. परिसरात इराणी टोळी सक्रिय असल्याची पोलिसांच्या गोपनीय शाखेला माहिती मिळाली आहे. ही इराणी टोळी पोलीस असल्याची बतावणी करून नागरिकांची दिशाभूल करीत लूटमार करीत आहे. नागरिकांनी इराणी टोळीच्या लोकांपासून सतर्क राहून कोणतीही संशयित व्यक्ती आढळल्यास किंवा दिसल्यास, त्यांच्या संशयास्पद हालचालीवर नजर ठेवून जवळच्या पोलिसांशी संपर्क साधावा, असे आवाहन करण्यात आले आहे.

अद्याप तालुक्यात लूटमारीची घटना घडली नाही. मात्र, तरीही या इराणी टोळीने मागील काही दिवसांत इतर काही शहरात पोलीस असल्याचे सांगून घर, पत्ता विचारण्याच्या बहाण्याने दागिने पळवून नेण्याच्या घटना घडल्या आहेत. शेजारील महागाव तालुक्यात अशी घटना घडली आहे. त्यामुळे पोलीस सतर्क झाले आहेत. आता नागरिकांनीही सतर्क व दक्ष राहण्याचे आवाहन पोलिसांनी केले आहे.