विद्यार्थिनीवर अत्याचार करणारा सैतान निघाला सराईत गुन्हेगार, २२ पेक्षा अधिक गुन्हे शिरावर

पॅरोलवर गावी आला अन् पुन्हा केला गुन्हा, अखेर अटक

उमरखेड (यवतमाळ) : शाळेत निघालेल्या एका चिमुरडीला खोटी बतावणी करत तिच्यावर लैंगिक अत्याचार करणाऱ्या आरोपीला पोलिसांनी अवघ्या ४८ तासात बेड्या ठोकल्या. अजिज खान मोहमद खान पठाण (४९) रा. नागापूर रुपाळा, असे या आरोपीचे नाव आहे. दरम्यान अजिज हा सराईत गुन्हेगार असून त्याच्या शिरावर २२ पेक्षा अधिक गुन्हे नोंद असल्याचे गुरुवारी जिल्हा पोलिस अधीक्षक डाॅ. पवन बनसोड यांनी पत्रपरिषदेत सांगितले.

१० ऑक्टोबर रोजी शाळेला जाण्यासाठी निघालेल्या ११ वर्षीय मुलीला त्याने पळशी (नवीन) बसथांब्यावर सकाळी साडेदहा वाजता गाठले. बसची वाट पाहत असलेल्या या मुलीला भावनिक बतावणी करून आरोपीने आपल्या दुचाकीवर बसवून बेलखेड शिवारात नेले. तेथे बळजबरी अत्याचार केला. नंतर तिला शहरात आणून सोडले. त्यानंतर चिमुकलीने आपबिती कथन केले. पोफाळी पोलिसांनी मुलीचे बयाण नोंदवून गुन्हा दाखल केला आणि घटनेचे गांभीर्य ओळखून लगेच आरोपीचा शोध सुरु केला.

परिसरातील सीसीटीव्ही फुटेज, तांत्रिक साहाय्य व नागरिकांच्या मदतीतून शहरानजीक असलेल्या नागापूर (रुपाळा) येथून आरोपी अजिज खान मोहमद खान पठाण याला अटक करण्यात आली. आरोपी अजिज खान मोहमद खान पठाण याने यापूर्वी अनेक महिलावर लैंगिक अत्याचार करुन त्यांना ठार मारले. हे गुन्हे मराठवाडा-विदर्भातील पोलिस ठाण्यांमध्ये नोंद असून तो सराईत गुन्हेगार आहे. नुकताच तो कारागृरातून पॅराेलवर गावी आला होता. नेमका याच काळात त्याने अल्पवयीन मुलीवर अत्याचार केला.

अतिरिक्त जिल्हा पोलिस अधीक्षक पीयूष जगताप यांच्या मार्गदर्शनात पोलिस उपअधीक्षक विनय कोते, एसडीपीओ प्रदीप पाडवी, पोफाळी ठाणेदार दीपक ढोमणे पाटील यांच्यासह उमरखेड ठाणेदार शंकर पांचाळ आणि पाच पथकातील कर्मचारी यांनी आरोपीचा छडा लावला. या गुन्ह्यात पोफाळी ठाणेदार दीपक ढोमणे पाटील तपास करीत असून आरोपीला न्यायालयात हजर करण्यात येणार असल्याचे पत्रपरिषदेत सांगण्यात आले.

आजी-माजी आमदारांनी केली मागणी

उमरखेड शाळा परिसरात रात्री काही शाळकरी मुले व काही तरुण अमली पदार्थ सेवनाच्या आहारी जात आहे. पोलिसांनी या प्रकाराला आळा घालण्यासाठी छापे मारावे, असे पत्रपरिषदमध्ये माजी आमदार राजेंद्र रजरधने यांनी सांगितले. यावेळी जिजाऊ बिग्रेडच्या जिल्हा अध्यक्षा सरोज देशमुख, दता गंगाधर उपस्थित होते. पत्रपरिषदेनंतर आमदार नामदेव ससाने, भाजपा जिल्हा समन्वयक नितीन भुतडा यांनी एसपींची भेट घेत आरोपीला कठोर शिक्षेची मागणी केली.

आज उमरखेडमध्ये रास्ता रोको

निरागस चिमुरडीवर लैंगिक अत्याचार करणाऱ्या आरोपीला फाशीची शिक्षा झाली पाहिजे यासाठी जन आंदोलन आधार संघर्ष समितीच्या वतीने १३ ऑक्टोबर रोजी स्थानिक संजय गांधी चौकात सकाळी ११ वाजता रास्ता रोको आंदोलन करण्यात येणार आहे. नागरिकांनी या आंदोलनात सामील होण्याचे आवाहन समितीचे अध्यक्ष जगदीश नरवाडे यांनी केले आहे.

आरोपी अजिज खान मोहमद खान पठाण रा. रुपाळा (नागापूर) याच्यावर खुनाचे १० गुन्हे व इतर १२ असे २२ च्या वर गुन्हे नांदेड, यवतमाळ जिल्ह्यात दाखल आहेत. इतर गुन्ह्यात शिक्षा भोगत असताना तो २७ सप्टेंबर रोजी जमानतीवर आला होता. त्यानंतर हा गुन्हा घडवून आणला. हा खटला जलदगती न्यायालयात चांगले सरकारी अभियोक्ता मागवून आरोपीला लवकर जमानत मिळू नये यासाठी प्रयत्न असणार आहेत.

- डॉ. पवन बनसोड, जिल्हा पोलिस अधीक्षक