दोन ट्रकच्या धडकेत तिघे गंभीर

परस्पर विरूद्ध दिशेने येणाऱ्या दोन ट्रकची टक्कर होऊन या अपघातात तीनजण गंभीर जखमी झाले. ही घटना गौराळा गावालगत शुक्रवारी सायंकाळी ५.१५ वाजताच्या सुमारास घडली.

लोकमत न्यूज नेटवर्क
मारेगाव : परस्पर विरूद्ध दिशेने येणाऱ्या दोन ट्रकची टक्कर होऊन या अपघातात तीनजण गंभीर जखमी झाले. ही घटना गौराळा गावालगत शुक्रवारी सायंकाळी ५.१५ वाजताच्या सुमारास घडली.
सय्यद समीर सय्यद नूर (२७) रा.यवतमाळ, बिस्मील्ला मनवर खान पठाण (४०) रा.यवतमाळ, गुणवंत आनंद सोनकुसरे (२१) रा.चंद्रपूर अशी जखमींची नावे आहेत. या अपघातातील सिमेंट टँकर क्रमांक एम.एच.३४-बी.जी.९४७७ हा वणीवरून मारेगावकडे निघाला होता, तर एम.एच.२९-टी.१७९३ क्रमांकाचा ट्रक मारेगावकडून वणीकडे येत असताना गौराळा गावालगत दोन्ही वाहनांची टक्कर झाली. अपघातानंतर दोनही ट्रकमधील तिनही जखमींना तातडीने मारेगावच्या ग्रामीण रूग्णालयात उपचारासाठी दाखल करण्यात आले. प्राथमिक उपचारानंतर तेथून त्यांना यवतमाळ येथे हलविण्यात आले.
मारेगाव परिसरात रस्ता अपघाताच्या घटनांमध्ये वाढ झाली आहे. वाहनांच्या गतीवर कुणाचेही नियंत्रण नाही. मुख्य रस्त्यावर गावे असतानाही भरधाव वाहने हाकली जातात. याच प्रकारात अपघात होत आहे. अवजड वाहनांची गतीही खूप असते. यातूनच नियंत्रण सुटून अपघात होत आहेत. गौराळा गावाजवळ अशाच प्रकारातून अपघात झाला.