राजूर : अकोले तालुक्यातील भंडारदरा परिसरातील काजवे पाहून परतत असताना शनिवारी पहाटे संगमनेर येथील तरुणांचे वाहन पलटी झाले. या अपघातात संगमनेर (इंदिरानगर) येथील संकेत यशवंत जाधव (वय- २४) हा तरुण जागीच ठार झाला तर दत्ता यशवंत शेणकर(वय-२९) हा तरुण गंभीर जखमी झाला.इतर दोघांना किरकोळ मार लागला आहे.संगमनेर येथील हे युवक मारुती स्वीफ्ट (एम.एच.१२, एच. एल.-१८३३) ने भंडारदरा परिसरात काजवे पाहण्यासाठी आले होते. शनिवारी पहाटे हे परत येत असताना भंडारदरा-रतनवाडी रस्त्यावर मुतखेल जवळील वळणावर गाडी आली असता ही स्वीफ्ट पलटी होऊन अपघात घडला. यात संकेत जाधव गाडी चालवत होता व तो यात जागीच ठार झाला. किरकोळ जखमी झालेल्या पांडुरंग तान्हाजी जाधव (घोडेकर मळा, संगमनेर )यांनी राजूर पोलीस ठाण्यात फिर्याद दिली. ग्रामीण रुग्णालयात प्राथमिक उपचार केल्यानंतर किरकोळ जखमी पांडुरंग जाधव व पांडुरंग दफेडार यांना सोडण्यात आले तर दत्ता शेणकर याच्या डोक्याला मार लागल्याने त्यास पुढील उपचारासाठी नाशिक येथे हलविण्यात आले.
अकोलेत पर्यटकांच्या वाहनाचा अपघात : एक ठार, एक जखमी
By लोकमत न्यूज नेटवर्क | Published: June 08, 2019 11:34 AM