शिर्डी : डाळिंबावर तेल्या रोगामुळे आलेले संकट दूर करण्यासाठी राज्याचा कृषी विभाग व कृषी विद्यापीठांनी आधुनिक तंत्रज्ञानाच्या साहाय्याने या रोगावर संशोधन करून ते शेतकर्‍यांच्या बांधावर पोहचवावे, असे प्रतिपादन राज्याचे स्वच्छता व पाणी पुरवठा मंत्री बबनराव लोणीकर यांनी शिर्डी येथे केले.कृषी विद्यापीठांसाठी सरकारने दिलेल्या हजारो एकर जमिनी पडिक आहेत. तेथील संशोधनाचा लाभ शेतकर्‍यांना झाला असता तर आत्महत्येचे प्रमाण रोखता आले असते, असे मतही त्यांनी व्यक्त केले. शिर्डी येथे सुरू असलेल्या डाळिंब उत्पादक संशोधन संघाच्या रौप्यमहोत्सवी वर्षानिमित्त आयोजित करण्यात आलेल्या डाळिंब परिसंवाद व प्रदर्शनाचा समारोप सोमवारी लोणीकर यांच्या हस्ते झाला. आमदार स्नेहलता कोल्हे यांच्या अध्यक्षतेखाली झालेल्या या कार्यक्रमाला आमदार राहुल आहेर, प्रदेशाध्यक्ष रविंद्र नवलाखा, उपाध्यक्ष अरुण देवरे, मराठवाडा कृषी विद्यापीठाचे डॉ. हरिहर कौसाडीकर, डाळिंबरत्न बाबासाहेब गोरे, फलोत्पादनचे संचालक डॉ. सुदाम अडसूळ, शिर्डीचे उपनगराध्यक्ष निलेश कोते आदींची उपस्थिती होती.आपण स्वत: शेतकरी असल्याने शेतकर्‍यांच्या समस्या आपणास माहीत आहेत. शेतकरी टिकला तरच देशाची प्रगती होणार असल्याने लोकप्रतिनिधींनी एकत्र येऊन भविष्यकाळात शेती व्यवसायाला संरक्षण व उद्योगाचा दर्जा प्राप्त करून द्यावा, असे आवाहन लोणीकर यांनी केले.आगामी काळात राज्य सरकार आणि डाळिंब संशोधन केंद्राशी एकत्रित विचारविनिमय करून डाळिंब उत्पादकांचे प्रश्न सोडवले जातील, अशी ग्वाहीही लोणीकर यांनी दिली.देशातील तीर्थक्षेत्रे स्वच्छ करण्याचा निर्धार नरेंद्र मोदी यांनी केला आहे. त्या शहरांमध्ये शिर्डीचा अंतर्भाव व्हावा, यासाठी प्रयत्न करू, येथे घनकचर्‍याची समस्या असून घनकचरा प्रकल्पाकरिता केंद्राकडून निधी आणण्यात येईल, असेही त्यांनी यावेळी सांगितले.आ. कोल्हे म्हणाल्या की, डाळिंब परिसंवादामुळे शेतकर्‍यांच्या समस्यांवर चर्चा करण्यासाठी योग्य व्यासपीठ उपलब्ध झाले आहे. डाळिंब उत्पादकांनी अधिक उत्पन्न मिळवण्याकरता उपपदार्थ निर्मितीवर भर देऊन त्याचे मार्केटिंग करावे, असा सल्लाही त्यांनी दिला.यावेळी उपनगराध्यक्ष निलेश कोते यांनीही मनोगत व्यक्त केले. संघाचे संचालक खेमराज कोर यांनी प्रास्ताविकात शेतकर्‍यांच्या समस्या मांडल्या. लोणीकर यांनी कृषी प्रदर्शनाला भेट दिली. (तालुका प्रतिनिधी)
￭ देश-विदेशातील आधुनिक तंत्रज्ञानाची मदत घेऊन विद्यापीठांनी डाळिंबाचे रोगमुक्त नवीन वाण विकसित करावे, डाळिंब उत्पादक शेतकर्‍यांना नैसर्गिक आपत्तीच्या वेळी संरक्षण मिळावे, त्यांना अनुदानावर खत व औषधे मिळावीत, यासाठी मंत्रिमंडळाच्या बैठकीत चर्चा घडवून आणण्याचे आश्वासन लोणीकर यांनी दिले.