पातूर, दि. ५- अकोला जिल्हयातील पातूर घाटातील वळणावर ४ मार्चच्या रात्री १0 वाजताच्या सुमारास ट्रक व बोलेरोची धडक झाल्याने ट्रक दरीत २00 फूट कोसळला. सुदैवाने या अपघात जीवीत हानी झाली नाही परंतु बोलेरोतील दोघेजण जखमी झाले.वाशिमकडून पातूरकडे आर.जे.५0 जी.ए.२३५५ क्रमांकाचा ट्रक शनिवारी रात्री १0 वाजताच्या सुमारास सरकी घेऊन येत होता. त्याचवेळी एम.एच.३0 ए.बी. ३७५८ क्रमांकाची बोलेरो जीप पातूरकडून वाशिमकडे जात होती. या दोन्ही वाहनांची घाटात समोरासमोर जोरदार धडक झाली. या घटनेत अपघातग्रस्त ट्रक बाजूच्या दरीत २00 फूट खोल कोसळला. या अपघातात बोलेरो गाडीचा चालक अलीमशहा व शे. जावेद हे दोघेजण जखमी झाले. हा अपघात घडल्यानंतर ट्रकचालक व क्लिनरने घटनास्थळावरून पळ काढला. अपघाताची माहिती मिळताच ठाणेदार अनिरुद्ध अढाव यांच्या मार्गदर्शनाखाली उपनिरीक्षक आनंद कांबळे, हेड कॉन्स्टेबल संजय इंगळे, विठ्ठल रायबोले पाटील, दुलेखान युसूफखान यांनी घटनास्थळी धाव घेऊन जखमींना तत्काळ अकोला येथे रवाना केले. हे वृत्त लिहिपर्यंंत पातूर पोलीस स्टेशनमध्ये या प्रकरणी गुन्हा दाखल करण्यात आला नव्हता.
२00 फूट खोल दरीत कोसळला ट्रक
By admin | Published: March 06, 2017 2:17 AM