मद्यधुंद कारचालकाने चौघांना उडविले!

तीन गंभीर जखमी; खदान पोलीस स्टेशनसमोरील घटना

अकोला, दि. २४-जुने शहरातील रहिवासी असलेल्या एका मद्यधुंद कारचालकाने त्याची कार भरधाव वेगात चालवित खदान पोलीस स्टेशनसमोर चार वाहनांना जबर धडक दिल्याची घटना घडली. यामध्ये तीन जण जखमी झाले असून त्यांच्यावर खासगी रुग्णालयात उपचार करण्यात येत आहेत. अपघाताची माहिती मिळताच खदान पोलिसांनी घटनास्थळ गाठून कारचालक शिरसाट नामक इसमास ताब्यात घेतले आहे.जुने शहरातील शिरसाट नामक इसम एम एच ३0 एएफ ३0४३ क्रमांकाची कार घेऊन कौलखेडकडून अशोक वाटिका चौकाकडे जात होता. यथेच्छ मद्यप्राशन केल्यानंतर त्याने सिंधी कॅम्पमधून कार भरधाव चालविली. या भरधाव कारचा थरार खदान पोलीस स्टेशनसमोर झाला. कारने सिंधी कॅम्पमधील रहिवासी शोभराज मंथरिया आणि निखिल मंथरिया यांच्या एम एच ३0 एएआर १९३५ क्रमांकाच्या दुचाकीला जबर धडक दिली. या अपघातात दोघेही गंभीर जखमी झाले असून त्यांना खासगी रुग्णालयात दाखल करण्यात आले आहे. या घटनेनंतर खदान पोलिसांनी तत्काळ घटनास्थळ गाठून शिरसाट नामक इसमास ताब्यात घेतले. त्याच्याविरुद्ध गुन्हा दाखल करण्याची प्रक्रिया पोलिसांनी सुरू केली असून वैद्यकीय तपासणीत सदर इसम यथेच्छ मद्यप्राशन करून असल्याचे समोर आले आहे.