अकोला : प्रवाशांचा वाढता प्रतिसाद लक्षात घेता, पश्चिम रेल्वेने ओखा-मदुरै-ओखा विशेष एक्स्प्रेसला सहा महिन्यांची मुदतवाढ देण्याचा निर्णय घेतला आहे. प्रवाशांच्या सोयीसाठी ही साप्ताहिक रेल्वे आता ३ जानेवारी २०२५पर्यंत धावणार असून, या गाडीला अकोला येथे थांबा असल्याने अकोलेकर प्रवाशांची सोय होणार आहे.
रेल्वेतील सुत्रांकडून प्राप्त माहितीनुसार, २४ जूनपर्यंत अधिसूचीत असलेली ०९५२० ओखा-मदुरै साप्ताहिक विशेष एक्स्प्रेस आता ३० डिसेंबर २०२४ पर्यंत दर सोमवारी २२:०० वाजता प्रस्थान स्थानकावरून रवाना होऊन चौथ्या दिवशी मदुरै स्थानकावर ११:४५ वाजता पोहोचणार आहे. ही गाडी दर मंगळवारी २२:१५ वाजता अकोला स्थानकावर येणार आहे. परतीच्या प्रवासात २८ जूनपर्यंत अधिसुचीत असलेली ०९५१९ मदुरै-ओखा साप्ताहिक विशेष एक्स्प्रेस आता ३ जानेवारी २०२५ पर्यंत दर शुक्रवारी १:१५ वाजता स्थानकावरून रवाना होऊन तिसऱ्या दिवशी १०:२० वाजता ओखा स्थानकावर पोहोचणार आहे. ही गाडी दर शनिवारी सकाळी १० वाजता अकोला स्थानकावर येणार आहे.
राजकोट-जडचर्ला विशेष सप्टेंबरअखेरपर्यंत धावणार
२४ जूनपर्यंत अधिसूचीत असलेली ०९५७५ राजकोट-जडचर्ला साप्ताहिक विशेष एक्स्प्रेस आता ३० सप्टेंबरपर्यंत दर सोमवारी राजकोट येथून दुपारी १३:४५ वाजता रवाना होऊन जडचर्ला येथे दुसऱ्या दिवशी मंगळवारी १९:३५ वाजता जडचर्ला येथे पोहोचणार आहे. परतीच्या प्रवासात ०९५७६ जडचर्ला-राजकोट साप्ताहिक विशेष एक्स्प्रेस १ ऑक्टोबरपर्यंत दर मंगळवारी जडचर्ला येथून २१:३५ वाजता रवाना होऊन गुरुवारी ०५:०० वाजता राजकोट स्थानकावर पोहोचणार आहे.