मुलीची छेड काढणारा कारागृहात

अल्पवयीन मुलीच्या घरात घुसून तिच्यासोबत लगट करणा-या युवकाची रवानगी कारागृहात.

अकोला, दि. ९-अल्पवयीन मुलीच्या घरात घुसून तिच्यासोबत अश्लील संवाद साधून लगट करणार्‍या युवकाविरुद्ध एमआयडीसी पोलिसांनी बुधवारी रात्री गुन्हा दाखल करून, त्याला अटक केली. पोलिसांनी त्याला गुरुवारी दुपारी प्रथम जिल्हा सत्र न्यायाधीश आर.जी. वाघमारे यांच्या न्यायालयात हजर केले. न्यायालयाने आरोपीची कारागृहात रवानगी करण्याचा आदेश दिला. पंधरा वर्षीय मुलीने दिलेल्या तक्रारीनुसार, बाभूळगाव येथील संकेत नागसेन सिरसाट (२२) याने मंगळवारी रात्री ७.३0 वाजताच्या सुमारास मुलगी घरात एकटी असल्याचे पाहून, जबरदस्तीने घरात प्रवेश केला आणि मुलीसोबत अश्लील संवाद साधत, त्याने मुलीला बाहुपाशात ओढून तिच्यासोबत लगट केली. त्यामुळे घाबरलेल्या मुलीने आरडाओरड करून आपली सुटका करून घेतली. मुलीने एमआयडीसी पोलीस ठाण्यात तक्रार दिल्यानंतर पोलिसांनी संकेत सिरसाट याच्याविरुद्ध भादंवि कलम ३५४, पॉस्कोनुसार गुन्हा दाखल करून त्याला अटक केली होती.