अकोला : अशोकवाटिका चौकात एका ट्रकने दुचाकीला जबर धडक दिल्याने दुचाकीस्वार जागीच ठार झाल्याची धक्कादायक घटना शनिवारी दुपारच्या सुमारास घडली. घटनेत मृतकाच्या सोबतीला गंभीर दुखापत झाली असून, त्यावर सर्वोपचार रुग्णालयात उपचार सुरू असल्याची माहिती आहे. प्राप्त माहितीनुसार,शिवणी परिसरातील रहिवासी वसीम शेख व हारुण शेख हे दोघे शनिवार २१ ऑगस्ट रोजी दुपारच्या सुमारास अशोकवाटिका परिसरातून दुचाकीने जात होते. दरम्यान, वाटिका चौकातील लोखंडी दुभाजकाजवळ मागच्या बाजूने येणाऱ्या ट्रकने त्यांच्या दुचाकीला जबर धडक दिली. या धडकेत हारुण शेख हा ट्रक खाली आल्याने त्याचा जागीच मृत्यू झाला, तर वसीम शेख हा गंभीर जखमी झाला. त्याला उपचारासाठी सर्वोपचार रुग्णालयात दाखल करण्यात आल्याची माहिती आहे. घटनेची माहिती मिळताच सिटी कोतवाली पोलीस व शहर वाहतूक नियंत्रण शाखेचे कर्मचारी घटनास्थळी दाखल झाले. पोलिसांनी मृतदेहाचा पंचनामा करुन शवविच्छेदनासाठी सर्वोपचार रुग्णालयात पाठविण्यात आले.
अपघातानंतर उडाली खळबळ
ट्रकखाली दुचाकीस्वार चिरडल्याने अशोकवाटिका चौकात एकच खळबळ उडाली होती. अपघातानंतर नागरिकांनी घटनास्थळी गर्दी केली होती. त्यामुळे सुमारे तासभर वाहतूक खोळंबली होती. काही वेळानंतर वाहतूक शाखेच्या पोलीस कर्मचाऱ्यांनी वाहतूक सुरळीत केली.