शिवणीत टिप्परमालकाची हत्या

मारेकरी फरार, पोलिसांकडून शोध सुरू.

अकोला - सिव्हिल लाइन्स पोलीस ठाण्याच्या हद्दीतील शिवणी येथील राहुलनगरातील रहिवासी टिप्परमालकाची अज्ञात मारेकर्‍यांनी हत्या केल्याची घटना सोमवारी पहाटे उघडकीस आली. सचिन भटकर (३५) असे मृतक युवकाचे नाव आहे. या प्रकरणी सिव्हिल लाइन्स पोलीस ठाण्यात रात्री उशिरापर्यंत गुन्हा दाखल करण्याची प्रक्रिया सुरू होती. हत्येचे कारण आणि मारेकर्‍यांचा शोध घेण्यात पोलिसांना अपयश आले असले तरी चार जणांना रात्री उशिरा संशयावरून ताब्यात घेण्यात आले. राहुलनगर येथील रहिवासी सचिन नाजुकराव भटकर (३५) याच्या मालकीचा टिप्पर असून, तो रेती, विटा यांसह विविध प्रकारचे साहित्य पोहचवण्याचा व्यवसाय करतो. रविवारी रात्री याच परिसरात असलेल्या एका खदानजवळ तो दोन वेळा शौचास गेला. त्यानंतर रात्री १२ वाजेच्या सुमारास आणखी तिसर्‍यांदा सचिन भटकर याच परिसरात गेला. तो पहाटेपर्यंत परत न आल्याने त्याच्या पत्नीने सासू-सासर्‍यांना माहिती दिली. त्यानंतर त्याच्या नातेवाइकांनी सचिनचा शोध सुरू केला असता. त्याची चप्पल व इतर साहित्य या खदान परिसरात आढळले. त्यानंतर आणखी शोध घेतला असता, सोमवारी पहाटे त्याचा मृतदेहच राहुलनगर परिसरात आढळला. सचिन भटकरच्या डोक्यावर पाइपने जबर हल्ला चढविल्याचे त्याचा मृतदेह पाहून निदर्शनास आले. त्यानंतर सिव्हिल लाइन्स पोलिसांनी घटनास्थळ गाठून प्रकरणाचा पंचनामा करून मृतदेह शवविच्छेदनासाठी रवाना केला. पोलिसांनी श्‍वानपथकाला पाचारण केले. श्‍वानपथकाने शिवणीतील खदान परिसरात एकाच जागेवर भटकत राहिले. त्यामुळे पोलिसांना पुढील सुगावा मिळू शकला नाही.