अमरावती : अविवाहित असल्याची बतावणी करून एका विधवेला विवाहाचे प्रलोभन देण्यात आले. त्यातून तिचे लैंगिक शोषण करण्यात आल्याचा धक्कादायक प्रकार धारणी येथे उघड झाला आहे. आरोपीचे खरे रूप उघड होताच तिने दुसऱ्या व्यक्तीशी लग्नसंबंध जुळविला असता आरोपीने तिचे अश्लिल व्हिडिओ तिच्या होणाऱ्या पतीसह त्याच्या भावाला देखील पाठविले.
याप्रकरणी, धारणी पोलिसांनी ३१ मे रोजी रात्री ९ नंतर आरोपी साजिद शेख सलिम शेख (३६, रा.धारणी) याच्याविरूद्ध बलात्कार व आयटी ॲक्टअन्वये गुन्हा दाखल केला. २३ जून २०२२ ते ३१ मे २०२३ दरम्यान शारीरिक कुकर्माची ती मालिका चालली. तक्रारीनुसार, पिडित २६ वर्षीय महिला ही विधवा आहे. गतवर्षी जूनच्या सुमारास तिची आरोपी साजिद शेखशी ओळख झाली. दरम्यान आपण अविवाहित असून तुझ्यावर प्रेम असल्याने तुझ्याशी लग्न करणार आहोत, अशी बतावणी त्याने विधवेकडे केली. तिलाही सशक्त आधाराची गरज असल्याने व तो अविवाहित असल्याने तिने देखील त्याच्या प्रेमाला होकार दिला.
दरम्यान त्याने तिला लग्नाचे आमिष देत धारणी येथील एका दुकानात तिचे लैंगिक शोषण केले. तो तिला चिखलदऱ्याच्या हॉटेलमध्ये देखील घेऊन गेला. तेथे देखील त्याने तिचे सर्वस्व लुटले. दरम्यानच्या काळात आरोपी साजिद शेख हा विवाहित असल्याची माहिती पिडिताला मिळाली. आरोपीने आपली फसवणूक केल्याचे लक्षात येताच पिडिता स्वत:हून त्याच्यापासून दूर गेली. तथा तिने अन्य व्यक्तीशी लग्न करायचे ठरविले.
महिला पोलिसांकडे आपबिती
पिडिता ही आपल्याला सोडून दुसऱ्या व्यक्तीशी लग्न करणार असल्याची कुणकुण आरोपीला लागली. त्यामुळे त्याने पिडिताचे तिच्या नकळत काढलेले तिचे अश्लिल व्हिडीओ तिच्या होणाऱ्या पतीला व त्याच्या भावाला व्हाॅट्सॲपवर पाठविले. त्यामुळे तिचा पुन्हा स्वप्नभंग झाला. ही बाब माहिती होताच पिडिताने ३१ मे रोजी रात्रीच्या सुमारास धारणी पोलीस ठाणे गाठले. तेथे महिला पोलिसांनी तिची आपबिती ऐकून घेऊन आरोपीविरूद्ध गुन्हा दाखल केला.
पीडित महिलेच्या तक्रारीवरून बुधवारी रात्री आरोपीविरूद्ध बलात्कार व आयटी ॲक्टअन्वये गुन्हा नोंदविला. आरोपीला तातडीने अटक केली.
- सुरेंद्र बेलखडे, ठाणेदार, धारणी