नगराध्यक्षांसह नगरसेवक संतापलेत, वातावरण तापले
परतवाडा : अचलपूर नगर परिषदेचे अभियंता दुधानी यांनी व्हॉटस्‌ ॲपवर टाकलेल्या वादग्रस्त पोस्टने नगराध्यक्षांसह नगरसेवक संतापले आहेत. या वादग्रस्त पोस्टमुळे नगर परिषदेतील राजकीय वातावरण ढवळून निघाले आहे. नागरिकांमध्येही याबाबत वेगवेगळ्या चर्चांना उधाण आले आहे.
नगराध्यक्षांसह नगरसेवकांनी संबंधित अभियंत्यावर कारवाई करण्याबाबतची तक्रार नगर परिषदेच्या मुख्याधिकाऱ्यांकडे या वादग्रस्त व्हॉट्‌सॲप पोस्टच्या अनुषंगाने केली आहे. या पोस्टमध्ये नगर परिषदेच्या पदाधिकाऱ्यांना अभियंत्याने ‘कौआ’ संबोधले आहे. ही बाब पदाधिकाऱ्यांचा अपमान असल्याच्या प्रतिक्रिया यामुळे उमटत आहेत. मुख्यमंत्र्यांबाबतही यापूर्वी याच अभियंत्याने आक्षेपार्ह छायाचित्रे व्हाॅट्‌सॲप ग्रुपवर व्हायरल केली. या अनुषंगाने शिवसेनेच्या पदाधिकाऱ्यांनी उपविभागीय अधिकाऱ्यांसह आपणाकडे निवेदन दिले असल्याचे या तक्रारीत म्हटले आहे.
नगर परिषदेच्या मुख्याधिकाऱ्यांना तक्रार दिल्यानंतर पुढे जिल्हाधिकारी व पोलीस ठाण्यात तक्रार देणार असल्याचे नगरसेवकांनी स्पष्ट केले. मात्र, वृत्त लिहिस्तोवर परतवाडा पोलीस स्टेशन व जिल्हाधिकाऱ्यांकडे तक्रार दाखल केली गेली नाही.
कोट
नगर परिषदेच्या अभियंत्याकडून व्हॉटस्‌ॲपवर टाकण्यात आलेली पोस्ट आक्षेपार्ह आहे. नगरसेवकांसह मुख्याधिकाऱ्यांकडे याबाबत तक्रार देण्यात आली आहे.
- सुनिता फिसके, नगराध्यक्ष, अचलपूर.