अमरावती : नांदगाव पेठ ते शेवती जहागीर मार्गावरील कोल्हापुरी बंधाऱ्यानजीक ४२ लोखंडी निडल्स चोराने लंपास केले. ही घटना बुधवारी उघडकीस आली. बंधाऱ्यातील लोखंडी निडल्स काढून बाजुला ठेवण्यात आले होते. दरम्यान जलसंधारण अधिकारी आनंद श्रीपाद शेंडे यांनी घटनास्थळाची पाहणी केली असता, त्यांना ही बाब निदर्शनास आली. घटनेची तक्रार जिल्हा परिषदेचे उपविभागीय जलसंधारण अधिकारी अनिल रामदास मोवाळे यांनी नांदगाव पेठ पोलिसांत नोंदविली. त्यानुसार पोलिसांनी आरोपी अनवर खा ऊर्फ अन्नु (रा. काळा मारोती, नांदगाव पेठ) याचेविरुध्द गुन्हा नोंदविला.
000000000000000000000000
फरशी स्टॉपवरून दुचाकी लंपास
अमरावती : फरशी स्टॉप स्थित स्टेट बॅकेसमोरून एका वृध्द व्यक्तीची दुचाकी चोराने लंपास केली. ही घटना बुधवारी उघडकीस आली. शरदचंद्र परशराम केळकर (७९ रा. संतोषीनगर) हे बॅकेत पैसे काढण्यासाठी गेले होते. त्यांनी एमएच २७-३९६६ या क्रमांकाची लुना बॅकेसमोर उभी केली होती. त्यानंतर ते बॅकेच्या रांगेत उभे होते. दरम्यान चोराने त्यांची लुना चोरून नेली. त्यांच्या तक्रारीवरून राजापेठ पोलिसांनी अज्ञात आरोपीविरुध्द गुन्हा नोंदविला.
000000000000000000000
राजापेठ परिसरात महिलेचा विनयभंग
अमरावती : राजापेठ परिसरातील झेंडा चौकात एका महिलेचा विनयभंग करण्यात आला. ही घटना बुधवारी उघडकीस आली. महिलेच्या तक्रारीवरून राजापेठ पोलिसांनी योगेश दिपक बुजरे (३२ रा राजापेठ) याचेविरुध्द गुन्हा नोंदविला. या घटनेचा प्राथमिक तपास पीएसआय आरती गवई यांनी केला.
0000000000000000000000000000000000000
त्या मद्यपी व्हॅनचालकाविरुध्द गुन्हा
अमरावती : रुग्णवाहिकेला धडक देणाऱ्या मद्यपी व्हॅनचालकाविरुध्द गाडगेनगर पोलिसांनी बुधवारी गुन्हा नोंदविला. विठ्ठल भैय्यालाल बावणे (36 रा. चुर्णी, ता. चिखलदरा) हे एमएच २७ बीएक्स ५४६५ या क्रमांकाच्या रुग्णवाहिकेने डफरीने रुग्णालयात येत असताना, त्यांच्या वाहनाला सांस्कृतीक भवनासमोर मारोती व्हॅन क्रमांक एमएच २७ एसी ६४३० ने धडक दिली होती. या घटनेची तक्रार विठ्ठल बावणे यांनी गाडगेनगर पोलिसात नोंदविली होती.