ताज्या पाऊल खुणांनी जाहीर केले अस्तित्व ,गाव शिवारात नजीकचा मुक्काम पावसाळ्यातही कायम ठेवला आहे
फोटो पी ०२ पोहरा
पोहरा बंदी : शुक्रवारी भानखेडा ते पोहरा मार्गावरील शेतात आढळलेल्या ताज्या पाऊलखुणांनी बिबट्याचे अस्तित्व असल्याचे दाखवून दिले; त्यामुळे पेरणीपश्चात मशागतीसाठी जाणाऱ्या मजुरांमध्ये भीती निर्माण झाली आहे. पावसाळ्यात पहिल्यांदाच बिबट्या शेतीशिवारात आढळून आल्याचे ग्रामस्थ सांगतात. शुक्रवारी पोहरा येथील शेतमालक उपसरपंच हरुण शहा पहाटे शेतात गेले असता त्यांना त्यांच्या शेतात बिबट्याच्या पायांचे ताजे ठसे आढळून आले. यावरून पावसाळ्यातही शेतीपरिसरात बिबट्याचा वावर असल्याची बाब अधोरेखित झाली आहे. उन्हाळ्यात पाण्याच्या व शिकारीच्या शोधात बिबट्याचा शेतशिवारापर्यंत मुक्त संचार दृष्टीस पडतो. मात्र पावसाळ्यात गडद, हिरव्यागार जंगलात मुबलक पाणीसाठा व अन्य वन्यप्राण्यांची संख्या अधिक असल्याने बिबट्याला भूक शमविण्यासाठी पोषक वातावरण आहे. तरीसुद्धा पावसाळ्याच्या दिवसांत बिबट्या गावानजीकच्या शेतीशिवारात शिकारीच्या शोधात येत असल्याचे बिबट्याच्या पाऊलखुणांवरून स्पष्ट झाले आहे. पावसाळ्यात रानडुक्कर, काळवीट, हरीण, नीलगाय या वन्यप्राण्यांचे कळप शेतातील पिकांकडे आकृष्ट होतात. शेतशिवारात शिरकाव करून पिकांची नासाडी करतात. त्यामागोमाग त्यांची शिकार करण्याकरिता पाठलाग करीत बिबट्याने शेतशिवारापर्यंत मजल गाठली आहे. पोहरा, चिरोडी, भानखेडा, कस्तुरा, सावंगा लालखेड, हातला, इंदला, बोडना, कारला, घात खेडा, पिंपळखुटा ही गावे जंगलालगत आहेत; त्यामुळे गावानजीकच्या शेतीशिवारात बिबट्यांच्या पाऊलखुणा आढळून आल्याच्या घटनेने शेतकरी, शेतमजूर भयभीत झाले आहेत.
कोड
माझ्या शेतात बिबट्याच्या पाऊलखुणा आढळल्याने मी घाबरलो. सध्या शेतात पीकपेरणीची कामे असल्याने शेतकरी व शेतमजूर शेतात राबतात, त्यावेळी बिबट्या मनुष्यासाठी धोकादायक ठरू शकतो; त्यामुळे त्याचा बंदोबस्त करणे गरजेचे आहे.
हरुण शहा शेरू शहा (उपसरपंच )
पोहरा बंदी