म्हणून ⁠⁠⁠तो पत्नीच्या फोटोवर करायचा फायरिंग, आरोपीकडून देशी कट्टा जप्त

 अमरावती - पत्नीच्या मृत्यूचा आरोप आईवर लागल्याने द्वेष भावनेतून तो मृत पत्नीच्या फोटोवर देशी कट्ट्याने फायरिंग करायचा. चार महिन्यांपूर्वी घडलेला हा प्रकार गाडगेनगर पोलिसांच्या निदर्शनास आला. मंगळवारी पोलिसांनी संजय वसंत दळवी (३५,रा.शेगाव, अमरावती) याला देशी कट्टा विक्री करण्याच्या बेतात असताना अटक केली आणि त्याच्याजवळील देशी कट्टा जप्त केला आहे. शेगाव परिसरातील रहिवासी संजय दळवी केवल कॉलनीत नागरिकांना देशी कट्टा विक्री करीत असल्याची माहिती गाडगेनगर पोलिसांना मिळाली होती. त्यानुसार पोलीस निरीक्षक कैलास पुंडकर यांच्या मार्गदर्शनात एएसआय अरुण कोडापे, पोलीस शिपाई अहमद अली, विक्की नशिबकर, प्रशांत वानखडे यांचे पथक केवल कॉलनीत पोहोचले. दरम्यान पोलिसांनी संजय दळवीची अंगझडती घेतली असता त्याच्या कंबरेत देशी कट्टा खोचलेला आढळून आला. पोलिसांनी संजय दळवीला अटक करून देशी कट्टा जप्त केला. त्याच्याविरुध्द ३, ७ आर्मअ‍ॅक्टनुसार गुन्हा नोंदविला. विशेष म्हणजे, संजय दळवी याने चार महिन्यांपूर्वी घरात फायरिंग केल्याची माहिती गाडगेनगर पोलिसांना मिळाली होती. वर्षभरापूर्वी संजय दळवीची पत्नी जळून मृत्यू पावली. तीच्या मृत्युला कारणीभुत असल्याचा आरोप संजयच्या आईवर लागला होता. तेव्हापासून संजयच्या मानसिकतेवर आघात झाला. तो घरातील भिंतीवर पत्नीचा फोटो लावून फोटोवर फायरींग करीत असल्याचे काही नागरिकांना दिसले होते. ही माहिती पोलिसांना मिळाली होती. त्यानुसार पोलिसांनी संजयच्या घराची पाहणी केली. तेव्हा भिंतीवर काही निशाण आढळून आल्याची माहिती पोलीस सूत्रांनी दिली.