अमरावती : मुंबई व आदिलाबाद येथे ‘लिव्ह इन’मध्ये राहताना तीनदा गर्भधारणा व गर्भपात होऊनही ‘मेल पार्टनर’ने तो मी नव्हेच’चा पवित्रा घेत ‘फिमेल पार्टनर’ला वाऱ्यावर सोडल्याची धक्कादायक बाब येथे उघड झाली आहे. तुर्तास ती पिडिता चौथ्यांदा गर्भवती असून, आरोपी हा ‘नॉट रिचेबल’ झाल्याने अखेर तिने पोलिसांत धाव घेतली आहे. याप्रकरणी खोलापुरी गेट पोलिसांनी आरोपी विशाल वसंतराव घोडे (२४, माताखिडकी, कोटेश्वर मंदिरावजवळ, अमरावती) याच्याविरूध्द बलात्काराचा गुन्हा दाखल केला. ९ नोव्हेंबर रोजी उघडकीस आली.
तक्रारीनुसार, स्थानिक रहिवाशी असलेल्या २१ वर्षीय तरुणीचे आरोपी विशालसोबत तीन वर्षांपासून प्रेमसंबंध आहे. ते दोघे दोन वर्षांपूर्वी मुंबईला गेल्यावर ती विशालसोबतच भाड्याने खोली करून राहत होती. यावेळी दोघांमध्ये शारीरिक संबंध प्रस्थापित झाले. दरम्यानच्या काळात विशालचे कुटुंबिय त्याला अमरावतीला बोलावित होते. त्यामुळे पीडिता व विशाल अमरावतीला परतले.
महिनाभर अमरावतीत राहिल्यावर पीडिता व विशाल आंध्रपदेशातील अदिलाबादला पळून गेले. तेथे सोबत राहत असताना विशालने लग्नाचे आमिष दाखवून तिचे अनेकदा लैंगिक शोषण केले. त्यातून पीडिताला तिनदा गर्भधारणा झाली. तिनही वेळा तिचा गर्भपात झाला. त्यानंतर यंदाच्या नवरात्रीत पीडित तरुणी व विशाल पुन्हा अमरावतीला परतले. मात्र, त्यानंतर ती व तो विभक्त राहू लागले. दरम्यान, आपण चौथ्यांदा गर्भवती असल्याची चाहूल तिला १ ऑक्टोबर रोजी लागली. तिने ती बाब त्याला सांगितली. त्यानंतर काही दिवस तो तिला भेटायला देखील आला. मात्र, आठवड्याभरापासून त्याने तिला भेटणे टाळले. तुर्तास पिडिता ही तीन महिन्यांची गर्भवती आहे.
आरोपी कुठे आहे, माहित नाही
आरोपीच्या ठावठिकाण्याबाबत आपण त्याच्या कुटुंबियाला विचारले असता, ते आपल्याला माहिती देत नाहीत. मात्र आरोपी विशाल हा अमरावतीमध्ये असल्याची आपली माहिती असून, त्याने आपल्याला लग्नाचे आमिष दाखवून शोषण केल्याची तक्रार पिडिताने नोंदविली आहे. यापुर्वी देखील आपण अनेकदा त्याला लग्नाबाबत विचारणा केली. मात्र, प्रत्येकवेळी त्याने टोलवाटोलव केली. त्याने लग्नाचे आमिष देऊन, पती पत्नीप्रमाणे राहत आपली फसवणूक केल्याचे तिने म्हटले आहे.