Maruti Grand Vitara कारचा फर्स्ट लूक नुकताच सर्वांसमोर लॉन्च करण्यात आला. त्यानंतर आता कारची किंमत ऑनलाइन लीक झाली आहे. ही मध्यम आकाराची एसयूव्ही असून ती ह्युंदाईच्या क्रेटा एसयूव्ही कारशी स्पर्धा करेल. समोर आलेल्या माहितीनुसार क्रेटाला जोरदार टक्कर देण्यासाठी याची किंमत क्रेटापेक्षाही कमी असणार आहे. एका इंग्रजी वृत्तपत्रानंही या लीक झालेल्या किमतीची माहिती दिली आहे. मात्र, कंपनीनं अद्याप कारची अधिकृतपणे किंमत जाहीर केलेली नाही.
माइल्ड हायब्रिड सिग्मा ट्रिम्स कारमध्ये ही पहिलीच कार ठरणार आहे. कारची सुरुवातीची किंमत 9.5 लाख रुपये (एक्स-शोरूम) असू शकते असा दावा करण्यात आला आहे. मात्र कंपनीकडून याला दुजोरा देण्यात आलेला नाही. असं झालं तर विटारा कार Hyundai Creta पेक्षा स्वस्त ठरेल. भारतात SUV कारच्या लोकप्रियतेत झपाट्याने वाढ झाली आहे.
मारुती ग्रँड विटारा एकूण पाच व्हेरिअंटमध्ये उपलब्ध होणार आहे. यानुसार सिग्मा (बेस व्हेरिअंट) ९.५० लाख रुपयांना उपलब्ध होऊ शकते. तर डेल्टा व्हेरिअंटची किंमत ११ लाख रुपये. झेटा व्हेरिअंट १२ लाख, अल्फा व्हेरिअंट १३.५० लाख आणि अल्फा AWD व्हेरिअंटची किंमत १५.५० लाख रुपये असू शकते. दुसरीकडे ह्युंदाई क्रेटाची सुरुवातीची किंमत १०.४४ लाख रुपये इतकी आहे.