क्वालालम्पूर : भारताच्या स्टार शटलर्स पी. व्ही. सिंधू आणि सायना नेहवाल यांनी बुधवारी सहज विजयासह मलेशिया मास्टर्स बॅडमिंटन स्पर्धेच्या महिला एकेरीची दुसरी फेरी गाठली. दुसरीकडे विश्व अजिंक्यपद स्पर्धेचा कांस्य विजेता बी. साईप्रणीत व किदाम्बी श्रीकांत हे सलामीलाच पराभूत झाले. एच. एस. प्रणॉयने मात्र विजयी सलामी दिली.माजी विश्वविजेती सिंधूने पहिल्या फेरीत रशियाची येवगेनिया कोसेत्सकाया हिचा केवळ ३५ मिनिटांच्या खेळात २१-१५,२१-१३ ने पराभव केला. सायनाने बेल्जियमची लियाने टेनवर केवळ ३६ मिनिटात २१-१५, २१-१७ असा विजय नोंदविला. आता सायना- सिंधू दुसऱ्या फेरीत भिडतील. दोघी मागील काही महिन्यांपासून ‘आॅफ फॉर्म’ आहेत. अनेक स्पर्धांमध्ये दोघींना सुरुवातीच्या फेरीत पराभूत व्हावे लागले. पुढचा सामना या दोघींमध्येच होणार असल्याने पुन्हा एकदा दोघींपैकी एकीला स्पर्धेच्या सुरुवातीलाच गाशा गुंडाळावा लागेल.दुसरीकडे, प्रनॉयने सलामीला केंटा सुनेयामाला २१-९, २१-१७ असे नमविले. साईप्रणीतचा डेन्मार्कचा रासमुस गेमकेकडून ११-२१, १५-२१ असा पराभव झाला. श्रीकांत दुसरा मानांकित चायनीज तैपेईचा चाऊ टीएन चेन याच्याकडून १७-२१, ५-२१ असा पराभूत झाला.
मलेशिया मास्टर्स : सायना, सिंधू विजयी
By ऑनलाइन लोकमत | Published: January 09, 2020 3:51 AM