तरुणाला पेट्रोल टाकून जिवंत जाळण्याचा प्रयत्न

धारुरच्या घाटातील थरार

धारूर : मित्राचा वाढदिवस साजरा करायचा आहे, असा बहाणा करून एका तरुणाला गोड बोलून जीपमध्ये बसविले व त्यानंतर त्याला पोत्यात टाकून धारुरच्या घाटात नेऊन पेट्रोल ओतून जिवंत पेटविण्यात आले. या घटनेत तरुणाचा चेहरा गंभीररित्या भाजला आहे. २१ सप्टेंबर रोजी रात्री साडेआठ वाजता ही थरारक घटना घडली. याप्रकरणी दिंद्रूड ठाण्यात चौघांवर गुन्हा नोंद करण्यात आला असून आरोपी फरार आहेत.

कृष्णा अर्जुन गायकवाड (१९, रा. नाकलगाव, ता. माजलगाव) असे जखमी युवकाचे नाव आहे. २१ सप्टेंबर रोजी रात्री आठ वाजता तो गावातील किराणा दुकानासमोर थांबला होता. त्यावेळी त्याचा मित्र आदिनाथ सुधाकर गायकवाड (रा. मंगरुळ क्र. २, ता. माजलगाव) याचा फोन आला. आपल्याला मित्राचा वाढदिवस साजरा करायचा आहे, तू रस्त्यावर ये, असे त्याने सांगितले. आदिनाथच्या बोलण्यावर विश्वास ठेवून कृष्णा मुख्य रस्त्यावर आला. काही वेळातच आदिनाथ तेथे पांढऱ्या वाहनातून पोहोचला. त्यावेळी आदिनाथ व त्याच्यासोबत असणाऱ्या इतर तीन जणांनी कृष्णाला शिवीगाळ करत बेदम मारहाण करण्यास सुरुवात केली. त्यानंतर त्यास पोत्यात टाकून चारचाकी वाहनातून सोनिमोहा ते धारूर घाटाच्या परिसरात नेले. तेथे गाडीतून खाली उतरवून अंगावर पेट्रोल टाकून जिवंत मारण्याच्या उद्देशाने पेटवून दिले. त्यानंतर ते चौघेही तेथून निघून गेले.

दरम्यान, जखमी कृष्णाला स्थानिकांनी वस्तीवर नेले. तेथे कृष्णाच्या मोबाईलवरून नातेवाईकांना संपर्क केला. त्यानंतर नातेवाईक तेथे पोहोचले. जखमी कृष्णाला तातडीने अंबाजोगाई येथील शासकीय रुग्णालयात उपचारासाठी दाखल करण्यात आले.

कृष्णाचे चुलते भीमराव निवृत्ती गायकवाड यांच्या फिर्यादीवरून आरोपी आदिनाथ सुधाकर गायकवाड व इतर तीन अनोळखींवर दिंद्रूड ठाण्यात गुन्हा दाखल करण्यात आला आहे. अद्याप आरोपी फरार आहेत.

.....

कारण गुलदस्त्यात

दरम्यान, कृष्णा गायकवाड व आदिनाथ गायकवाड हे मित्र आहेत. मात्र, आदिनाथने कृष्णाला जिवंत जाळण्याचा प्रयत्न का केला, याचे गूढ कायम आहे. सध्या चारही आरोपींचा शोध सुरू असून त्यांच्या अटकेनंतर गुन्ह्यामागचा हेतू समोर येईल, असे सहायक निरीक्षक प्रभा पुंढगे यांनी सांगितले.

......

230921\img-20210923-wa0084.jpg

संबृःधीत युवक