ठळक मुद्देहॉटेलवरील मुख्य विद्युत वाहिनीस झाला स्पर्श
कडा (बीड ) : एका हॉटेलच्या उद्घाटनानिमित्त रविवारी (दि.१ ) विद्युत रोषणाईचे काम करताना उच्चदाब विद्युत वाहिनीचा स्पर्श झाल्याने एक तरुण गंभीररीत्या भाजला गेला. या तरुणाचा उपचारादरम्यान गुरुवारी (दि.५ ) पुणे येथे मृत्यू झाला. राजेंद्र अनिल जीवे ( २४ ) असे मृताचे नाव आहे.
आष्टी तालुक्‍यातील शिरापुर येथील राजेंद्र जीवे हा गेल्या पाच वर्षापासून विद्युत रोषणाईचे काम करतो. राजेंद्र रविवारी बीड-नगर रोडवरील कडा येथे एका हॉटेलच्या विद्युत रोषणाईचे काम करत होता. यावेळी हॉटेलवरून गेलेल्या 33/ के. व्ही. उच्चदाब विद्युत वाहिनीला त्याचा स्पर्श झाला. यामुळे तो गंभीररीत्या भाजला गेला. यानंतर राजेंद्रवर पुणे येथील एका खाजगी दवाखान्यात उपचार सुरू सुरु होते. मात्र उपचारादरम्यान गुरूवारी त्याचा मृत्यू झाला. त्याच्या पश्चात आई, वडील, भाऊ, बहीण असा परिवार आहे.