परळी: शहरातील भोई गल्लीत सोमवारी सायंकाळी आपसातील दोन गटात तलवारबाजी होऊन काठ्याने मारहाण करण्यात आली. यामध्ये दोन्ही गटाचे एकूण पाच जण जखमी झाले असून दोघांना अंबाजोगाईच्या स्वामी रामानंद तीर्थ वैद्यकीय रुग्णालयात दाखल करण्यात आले आहे. या प्रकरणी मंगळवारी पहाटे एकूण १४ जणांविरुद्ध परळी शहर पोलीस ठाण्यात गुन्हा दाखल करण्यात आला आहे. याप्रकरणी एका आरोपीस परळी पोलिसांनी अटक केली आहे. घटनास्थळी एक तलवारही पोलिसांनी जप्त केली.
सोमवारी सायंकाळी मारामारीची घटना घडल्याचे समजताच घटनास्थळी परळी शहर पोलीस ठाण्याचे पो.ना. हनुमान मुंडे ,गोविंद भताने, राठोड व आरसीपीचे जवान तातडीने दाखल झाल्याने पुढील अनर्थ टळला. घटनास्थळावरून पोलिसांनी एक तलवार जप्त केली. पोलीस येताच मारामारी करणारे पळून गेले. घटनास्थळी अंबाजोगाई उपविभागीय पोलिस अधिकारी सुनील जायभाये,परळी शहर पोलीस ठाण्याचे पोलीस निरीक्षक हेमंत कदम,स पो नी. प्रदीप एकशिंगे ,अशोक खरात यांनी भेट दिली.या प्रकरणी पो.ना. हनुमान मुंडे यांनी परळी शहर पोलिस ठाण्यात फिर्याद दिली आहे. त्यानुसार शेख एजाज, मुज्जू खान ,गफार सय्यद , अज हर खान,शेख नदीम ,शेख शहानवाज व अन्य आठ जणांविरुद्ध परळी शहर पोलीस ठाण्यात गुन्हा दाखल करण्यात आला आहे. तपास सपोनि अशोक खरात हे करीत आहेत.या घटनेप्रकरणी पोलिसांनी शेख एजाज गौस (३२रा. भोई गल्ली, परळी) यास अटक केली आहे.