बीड : मित्रासोबत सुरू असलेल्या प्रेम प्रकरणाची माहिती आई-वडिलांना देईन, अशी धमकी देत अल्पवयीन पुतणीला काकाने ब्लॅकमेल केले. तब्बल चार वर्षांपासून त्याने तिच्याशी कुकर्म केले. हा धक्कादायक प्रकार तालुक्यातील एका गावात २३ मार्च रोजी उघडकीस आला.
मूळ बीड तालुक्यातील गाव असलेली पीडित मुलगी आई-वडिलांसोबत पुण्यातील पिंपरी चिंचवड येथे वास्तव्यास आहे. तेथे ती सध्या पदवीच्या प्रथम वर्षात शिक्षण घेते. २५ एप्रिल २०१८ रोजी शाळेला सुट्या लागल्याने ती गावी आजी - आजोबांकडे आली होती. यावेळी तिच्याकडील मोबाईल घेऊन ४० वर्षीय चुलत्याने तू तुझ्या मित्रासोबत बोलू नकाे, माझ्यासोबत प्रेम कर, असे म्हटले. त्यानंतर २८ एप्रिल २०१८ रोजी त्याने तिच्याशी बळजबरीने कुकर्म केले. कोणाला सांगितल्यास जीवे मारण्याची धमकी दिली. पुढे पीडिता पुण्याला परत गेल्यावर तेथे येऊन चार ते पाचवेळा जबरदस्तीने अत्याचार केला. डिसेंबर २०२० मध्ये त्याने शेवटचा अत्याचार केला. त्यानंतर पीडितेने घडला प्रकार आईला सांगितला. यावर पीडितेच्या आई-वडिलांनी गावी येऊन त्यास समज दिली. मात्र, त्याने धमकी देत तुमची मुलगी गावी आणून सोडा, अन्यथा तिची बदनामी करून जीवे मारण्याची धमकी दिली. पीडितेच्या तक्रारीवरून बीड ग्रामीण ठाण्यात बलात्कार, बाललैंगिक अत्याचार प्रतिबंध कायद्यान्वये गुन्हा नोंद झाला. तपास पिंक मोबाइल पथकाकडे वर्ग करण्यात आला.
चार दिवसांची पोलीस कोठडी
बीड ग्रामीण ठाण्याचे पोलीस निरीक्षक संतोष साबळे, उपनिरीक्षक देविदास आवारे, पिंक मोबाइल पथकाच्या उपनिरीक्षक मीना तुपे यांनी घटनास्थळी भेट दिली. आरोपीला २३ रोजी रात्रीच अटक केली होती. त्यास २४ रोजी न्यायालयात हजर केले असता २७ मार्चपर्यंत पोलीस कोठडीत ठेवण्याचे आदेश दिले, अशी माहिती उपनिरीक्षक मीना तुपे यांनी दिली.