भारतीय संस्कृती आणि परंपरांमध्ये ज्योतिषशास्त्राला अनन्य साधारण महत्त्व आहे. नक्षत्र, ग्रह-तारे यांचे चलन, परिभ्रमण यांच्या अभ्यासातून मानवी जीवनावरील प्रभाव पाहिला जातो. ज्योतिषशास्त्र हे असे शास्त्र आहे, ज्याच्या अनेकविध शाखा आहेत. या शाखांच्या माध्यमातून एखाद्या व्यक्तीविषयी अंदाज बांधता येतात. केवळ जन्मकुंडली नाही, तर हस्तरेषा, स्वप्नशास्त्र, अंकशास्त्र, समुद्रशास्त्र यातूनही भविष्यकथन करता येते. यापैकी एक शास्त्र म्हणजे अंकशास्त्र अंकशास्त्रात जन्मतारखेवर आधारित मूलांकावरून व्यक्तीचा स्वभाव, वैशिष्ट्य, भविष्यकथन केले जाते. जसा प्रत्येक राशीचा स्वामी असतो, तसेच प्रत्येक मूलांकालाही ग्रहांचे स्वामित्व बहाल केलेले आहे.
मराठी महिन्यानुसार, चातुर्मासातील एक महत्त्वाचा महिना श्रावण सुरू आहे. तर इंग्रजी कॅलेंडरनुसार ऑगस्ट महिन्याला सुरुवात झालेली आहे. ऑगस्ट हा ८ वा महिना आहे. अंकशास्त्रानुसार, मूलांक ८ चा स्वामी शनी देव आहे. एखाद्या व्यक्तीच्या जन्मतारखेवरून त्या व्यक्तीचा मूलांक काढला जातो. ज्या लोकांचा जन्म ८, १७ आणि २६ तारखेला झाला आहे, त्यांचा मूलांक ८ आहे. या मूलांकाशी संबंधित लोक खूप मेहनती, बुद्धिमान आणि प्रत्येक गोष्टीवर बारीक लक्ष ठेवतात. ते सहसा खूप शांत स्वभावाचे असतात. त्यांच्या मनात काय आहे, याचा थांग लागणे खूपच कठीण मानले जाते. या मूलाकांवर शनी देवाची कृपा असते, असे सांगितले जाते.
खूप मेहनत करतात आणि स्वबळावर मिळवतात यश
मूलांक ८ असलेल्या व्यक्तींचा स्वभाव गूढ असतो. हे लोक मेहनती असतात आणि स्वतःच्या हिंमतीवर यश मिळवतात. त्यांना समाजात खूप मान-सन्मान मिळतो. ते नेहमी इतरांना मदत करतात आणि सत्याचे समर्थन करतात. कोणतेही काम पूर्ण केल्यानंतरच ते श्वास घेतात. याचा अर्थ ते त्यांच्या ध्येयाबाबत खूप गंभीर असतात. तसेच हे लोक नशीबापेक्षा कर्मावर जास्त विश्वास ठेवतात. त्यामुळे त्यांना प्रत्येक कामात सहज यश मिळते. मात्र जीवनात यशस्वी होऊनही हे लोक साधे जीवन जगतात.
अपार संपत्तीचे स्वामी असतात
मूलांक ८ असलेल्या व्यक्तींना भरपूर पैसा मिळू शकतो. त्यांची आर्थिक स्थिती सामान्यतः स्थिर असते. खर्च करण्याकडे त्यांचा अधिक कल नसतो. ते बचत योजना आणि गुंतवणुकीच्या माध्यमातून चांगला नफा कमावू शकतात. मूलांक ८ च्या व्यक्ती बहुतेक अभियंते किंवा इलेक्ट्रॉनिक्सशी संबंधित काम करतात. हे लोक चांगले उद्योगपती देखील होऊ शकतात. बिल्डिंग मटेरियल सप्लायर, लोखंड आणि तेलाशी संबंधित व्यवसाय त्यांना अधिक फायदा देतात. हे लोक पोलिस किंवा लष्करासारख्या सेवेतही काम करतात. यासोबतच हे लोक संशोधनाच्या क्षेत्रातही चांगले नाव कमावतात. सदर माहिती सामान्य गृहितके आणि ज्योतिषीय मान्यतांवर आधारित असून, तुमच्या मूलांकाविषयी जाणून घेण्यासाठी तज्ज्ञ व्यक्तींचा सल्ला उपयुक्त ठरू शकेल, असे सांगितले जाते.